Mi tam takin an dem karah Israel-in Gaza City bei zel

Mi tam takin an dem karah Israel-in Gaza City bei zel
Israel chuan ruahmanna thui tak neia Gaza City a beihna chu chhunzawm zelin Thawhtanni zan zankhua khan thlawhna atangin a kap a, Thawhlehni chhunah lei lamah nasa takin a nawr bawk.
Palestinian sang telin Strip-a kalna kawng awm chhun, tuipui kam hrulah ram laili an pan khawm a, tlanchhia tam tak awm tawh sate an zawm mek.
Ram tam takin an hmalakna sawisel mah se Israeli Prime Minister Benjamin Netanyahu-a Hamas ‘inkulhna lian tawp ber’ a tihah ‘na takin beihpui an thlak’ tih a sawi.
Na zawka an beih mek lai hian UN hnuaia chhuitute chuan Israel hian Gaza-a indonaah hian hnam suatna an kalpui ngei tih a sawi.
Palestinian tam tak chuan sabengtung hnuh tawlailir, rickshaw leh lirthei hmangin an bungrua sang taka phur chungin Strip chhim lam panin an chhuak a, thenkhat kein an kal bawk.
Gaza City tam zawk chu kum 2023 atanga indona chhuak tawh avang hian a chhe tawh a, heti chung hian Palestinian maktaduai khat vel chu an tlanchhiatna atangin an haw leh tawh a, an inte chu chhe nasa mah se a theih ang angin an awm lui.
Israel Defense Forces (IDF) chuan tunah hian mi 3,50,000 vel tlanchhia an awm a, maktaduai chanve vel erawh khawpuiah an la awm niin a sawi a. La awm mekte chu chhim lama Strip tuipui kam hrula ‘humanitarian zone’ an tih lam pan turin an ti.
Palestinian tam tak chuan chhim lam hi an pan thei lo va, mi thenkhat dang chuan chhim leh ram laili pawh Israel-in thlawhna atanga a kah reng tho avangin a him chuang lo niin an sawi a. Thenkhatin puan in kaihna tur hmun an chang tawh lo niin an sawi bawk.
Gaza-a Hamas enkawl health ministry chuan darkar 24 liam ta chhungin mi 59 thiin mi 386 velin hliam an tuar leh tawh niin an sawi a. Ei tur kham hmuh loh vangin naupang pakhat telin mi pathum an thi bawk.
“Gaza a kang mek,” tiin Israeli Defence Minister Israel Katz-a chuan beihpui an thlak tan mek laiin X-ah a tar lang a. “IDF chuan firfiakte hmun an chhu mek a, IDF sipaite hian huaisen takin mi hrente an chhuah theih nan leh Hamas hneh tumin an bei,” a ti bawk.
IDF thuneitu pakhat chuan khawpuiah hian Hamas raldo mi 3,000 vel an la awm niin a sawi.
Israel-in Gaza City a bei hi ram tam takin an dem a, UN human rights chief Volker Türk-a chuan ‘pawm theih loh hulhual’ a ti.
UK Foreign Secretary Yvette Cooper-a chuan ‘thisen luan belhna, pawisawi lo civil mi thih belhna leh mi hren la damte nun tiderthawngtu mai’ niin a sawi.
Turkish foreign ministry pawhin Israel-in ‘mi a suatna’ kalphung thar nia sawiin mi tam tak baihvai an awm belh lehna tur niin a sawi a. German Foreign Minister Johann Wadephul-a pawhin ‘kawng dik lo zawhna chiang tak’ a ti bawk.
Hetih lai hian US Secretary of State Marco Rubio-a chuan Thawhtannia Netanyahu-a nena thuthar lakhawmtute an kawmnaah beihpui thlak hi a tha lo ti zawngin a sawi lo va, an duh dan ber erawh inbiaka tihtawp a ni tih a sawi.
UN commission of inquiry chuan indo a chhuinaah Israel hian ‘hnam pum suatna thil’ a ti ngei tih a sawi a. Israeli sipaite hian ‘hmeichhia leh mipa thliara an laka tharum thawhna’ a thlen a, naupangte pawh an that a, ruahmanna mumal tak nen sakhua, culture leh zirna hmunte an bei niin an sawi bawk.
Israeli foreign ministry chuan he report hi hnawlin ‘dik lo leh fiahna chiang awm lo’ niin a sawi ve thung.
Israel hian October 7, 2023-a Hamas-in an ram beia mi 1,200 an thah leh hren tura mi 251 an hruai phuba lain Gaza hi a bei a. Mi 64,964 thi awm tawhin a zahve dawn hi hmeichhia leh naupang niin Gaza-a health ministry chuan a sawi.