By euben Lalnunthara Hnamte
-- Advertisement --
Khawvela kan awm chhung hian
khawtlang, Pawl, Kohhranah te hruaitu kan neih a ngai thin a. Pathian pawhin Israel hote kha hruaitu a siamsak thin a nih kha. Mihring hi a huhova khawsa tura duan kan ni a, mihring kan nih chhung chuan inlak hran tak theih a ni lova, eng pawl ber hnuaiah emaw kan awm chu a ngai tho tho thin. Eng pawl kohhranah pawh hruaitu bik awm hi Pathianin min din dan a ni hrim hrim mai a, hruaitu awm lovin pawl a awm thei lo a ni. Hruaitu nih hi tunlai khawvel changkang zelah chuan a hlu tulh tulh emaw tih mai tur a ni a. Tunlaiah phei chuan a chuhin kan inchuh a ni ber ta mai. Political Party-ah phei hi chuan hruaitu nih inchuh avanga buaina hi a thleng nasa thei hle a, state dangah phei hi chuan inthahna hialte pawh a thleng thin a ni.
Hruaitu dinhmun :
Hruaitu dinhmun hi thil khirhkhan leh pawimawh tak a ni a. Chaka khelh vak chi pawh a ni lem lo. Hruaitu nih chak takte hi hruaitu tha an ni lo fo. Lord Montgomery chuan, “Hruaitu dinhmun chu thil tum thuhmun neia mi dangte hruai tura duhna leh theihna nei, miin an rin ngam hi an ni,” a ti a. Dr. John R. Mott erawh chuan, “Hruaitu chu a ngaihna hria/a kawng hria, midang kal khalh thei, a hnung zui tura midangte pawt kal thei te hi an ni,” a ti thung. Hruaitu dinhmun hi a nihna takah chuan chhiahhlawh hna a ni ber a, midangte tih peih loh ti tu, mi hmaa kal ngam leh sulsutu an ni a. Intih lal leh thuneihna hmansual lam kha a kawk lo. Dr John R Motta chuan “Hruaitu chu kalna tur hria, amah pawh kal hmasa a, a hnung zui thei tura midangte hnuk theitu hi a ni.” A lo ti a ni.
Hruaitu tha kan mamawh:
A ralthuam leh a theihna nasa tak hmanga khawvel hneh tum, pa rothap Alexander Ropui-a khan thil engpawh tih dawn hian hruaitu tha pawimawh theihzia uar takin a sawi fo thin. A thusawi tam tak zinga pakhat ”Ka hmaah hian Sakeibaknei za rual zet hi min beih tumin lo kal ta se, hruaitu atan Beram hmang se ka hlau lo ang; Amaherawhchu, Beram za rual hi bei dawn i la, an hruaitu atan Sakeibaknei hmang ta thung sela, chu zet erawh chu ka hlau khawp ang,” a ti a ni. Hei hian thiltih leh hmalak dawna hruaitu pawimawh theihzia a tarlang chiang viau awm e. Khawvel ram zau zawk kan thlir chuan hruaitu tha awmna ram chu ram vannei tak an ni thin a. Sawrkar tha (Good Governance) awm lohna ramah chuan a mipui chengte an rethei a, an intodelh lo a, mipui mangang leh lungawi lo an phun luai luai zel a, harsatna hrang hrang hian a tlakbuak a ni deuh ber thin; chu chu hruaitu tha awmlohna ram a ni tlangpui zel a ni.
Hruaitu tha awmna ramah ve thung chuan mipuite thla a muang a, mipui leh Sawrkar inkar boruak a tha hle, intodelhna leh hmasawnna tam tak hmuh tur an awm thin a ni.
Ziaktu pakhat chuan, ” Tum mumal tak pawh nei mang lova hruaitu dinhmuna din lungawipui ve ringawt chingho hi chu hruaitu an nih rei poh leh mite ngaih theih loh an hlawh rei a ni mai,” a ti a, a dikna chen a awm ngei ang.
Hruaitu ni lova hotu emaw inti tlat kan tam ta hle mai. Lal Isua tawngkam a thupuia kan han tarlan hi a pawimawh hle mai a. Hruaitute hian kan hruaite leh mipuiah kan inteh ngam hi a pawimawh a. Hruaitu inti tam tak hi chuan mite ah leh kan hruaiteah kan inteh ngam lova, mi sawiselna te kan haw zawk thin. Hruaitu tlawn theih, fakna emaw avanga lawm mai mai; engemaw a tlawn lungawi mai mai theih nih te hi hlawhchhamna a ni. Hruaitu tha chuan ‘I va han titha em’ tih te,’ ka lo ti dik lo a ni’ tih te hi a hreh loh a pawimawh. Peter Drucker chuan, “Hotute hi hna thawk tha ber an nih a tul kher lo; amaherawhchu, hnathawk tha berte hnathawh lo hriatsaktu, pawmpuitu leh fuih thathotu an ni zawk” a ti a ni. Lal Isua hi hruaitu tha ber a ni a, mi te’n an hmuh dan kha a inteh ngam tlat a ni. Hmahruaitu tha ni a, ramin hma a sawn dawn chuan hruaitu kha midangte thlir danah a inteh ngam a pawimawh. Chuta tang chuan a chaklohna laite a insiam that zel kha thil pawimawh tak a ni.
Kan ram pawh hian hruaitu tha tak kan mamawh khawp mai. Mipuite hmasawnna, zalenna leh lungawina hmuna hruai kha hruaitu chuan a mawhphurhna a ni a. A tul a nih chuan a dinhmun pawh midang a kian ngam tur a ni a, chu chuan hruaitu tha a nihzia kha a tilang zawk a ni.Kan ramin inthlan kan hmachhawn leh dawn a; mipuite kan pawimawh leh dawn hle mai. Therhlo leh dinhmun sanna lam ngaihtuah lova, kan ramin hma a sawn theihna tura hruaitu tha thlanchhuah hi mipuite’n kan mawhphurhna a ni. Mite’n eng angin nge min hmuh? tia inteh ngam khawpa huaisen len dikna duh Hruaitu tha thlang turin i han tang sauh sauh ang u hmiang.