Mi thar lawmluhnaah Congress an kim em?

Congress party-in harsatna an tawk a, an mi
pawimawhte zingah lungawi lo te, party atanga chhuak hial te pawh an awm. Chutiang karah chuan Thawhlehni khan Vanapa Hall khat an kalkhawm a, heta tel ve lo hi an awm em tih chu politics ngaihvente thil hriat chak a ni.
Congress Legislature Party (CLP) leader, lungawi loh vanga party treasurer a nihna atanga chawl Zodintluanga Ralte thutna tura an tih a ruak a, thutna awl thlalak hi social media lamah a darh nghe nghe.
Thu dawn danin, Zodintluanga Ralte hi Delhi-ah a zin a, Vanapa Hall-a a kal duh loh vang ni lovin, Delhi-a a la cham vang a ni. Mahse, a zin chungin a thutna tur hauhsak a ni tihna a ni thung.
‘Party hruaitute hian a zin tih hi an hre lo tihna a ni thei em?’ tih te, ‘Hre reng chungin a thutna tur khatiang khan an hauhsak tihna a ni thei em?’ tih ngaihtuah an awm.
Bhavan atanga thu dawn danin, Congress mi pawimawh zawng zawng kha an thutna tur hauhsak an ni a, MPYCC leh NSUI te’n an buaipui a, tute nge zina zin lo tih ngaihtuah lovin CLP leader thutna tur pawh kha an lo hauhsak a ni.
Congress chhungkaw rorelnaa a chak lo lama tang John Rotluangliana, minister hlui chu Vanapa Hall-ah hian a kal.
Ani hi Dampa biala ding tura ngaih, Dampa bial pawh lo fang tawh a ni a, mahse party-in ding turin an ti lo nia ngaih niin, a chawl leh rih nia hriat a ni.
Tun hnaia party-a a nihna atanga an chawlhtir Lalrobiaka, MLA hlui pawh a tel lo nia hriat a ni.
Chutih laiin inthlanpui hnuhnung bera bial chang lo, minister hlui pahnih, R Romawia leh JH Rothuama te an tel a, a tawp thlengin an awm.