Miami khawpuiah Piastri chak leh

Miami khawpuiah Piastri chak leh
Miami, Florida-a Miami International Autodrome-ah Pathianni khan Miami Formula One Grand Prix an tlan a, McLaren driver Oscar Piastri bawk pakhatna ni lehin, team-mate Lando Norris chu pahnihnaah a thleng a, McLaren one-two kan hmuh laiin pathumna chu Mercedes car khalhtu George Russell a ni a; Red Bull superstar Max Verstappen talbuai zui zelin, lawmman semna dawhsan lawn pha lo tawk chiahin palinaah a thleng.
Ti hian, 1 Formula One championship-ah Austraoan tlangval Piastri hian a hmahruaina a sawhnghet leh hret a, tun season-a vawiruk an tlan hnuah vawili pakhatna a ni tling ta a, point 131 kawl tling tawhin, a hnuai chiahah awm a team-mate Briton Norris pawh vawikhat chak ve tawhin, point 115 a hum tling ve tawh.
Driver standing-a pathumna Dutch driver Verstappen pawh kumin F1 intlansiakah vawikhat bak a la chak zo lo a, point 99 hum chungin pathumnaah a awm mek a; a hnung chiahah British driver Russell chuan point 93 nen a dawt.
Pathia nni Miami Grand Prix-ah Oscar Piastri chuan intlansiak a thunun leh a, a zawna vawithum chakin, hat-trick a siam a; Miami hma chiaha intlansiak hnuhnung pahnih Bahrain leh Saudi Arabia ramah a lo chak tawh a nih kha.
Season kal laiah hian McLaren team an chetha tluang rih kher mai a, intlansiak vawiruk awm tawhah vawikhat chiah pakhatna dinhmun luah phak loh an la nei.
1997-98 season-a ropui Mika Hakkinen-a hnu lamah Pathianni kha McLaren driver-in a zawna race vawithum hnehna a chan leh hmasakber a ni.
Norris laka point 16-a sang Piastri chuan Miami khaw tlankawnga hnehna a chan leh hnuah an team dinhmun sawiin, “Kum hnih liamta khan Miami tlankawngah hian kan team kan muang ber a, tunah erawh second 35 zeta fawr chungin Grand Prix hnehna kan chang a, result awihawm loh a ni,” a tichhuak ve hial.
Red Bull world champion Max Verstappen kha McLaren driver pahnihin an lehpel ve ve a, podium a luah pha ta lo hial a ni.
Williams driver Alex Albon chu pangana niin, Kimi Antonelli of Mercedes leh Ferrari pair Charles Leclerc leh Lewis Hamilton a hmakhalh.
Carlos Sainz chuan pakuana hauhin Williams tan double points a thawkchhuak a; five second penalty hmu chungin Red Bull car khalhtu dang Yuki Tsunoda chuan point hnuhnung ber hmuin 10-na a luah.