Miami Open title humhim chunga Sunshine double thei Sabalenka
Inrinni Miami Open women’s singles final-ah defending champion Aryna Sabalenka chuan tualchhung nula rinkai Coco Gauff lakah 6-2, 4-6, 6-3 hnehna chang lehin, US Open tih loha United States rama tennis tournament lian pahnih khelh zawn thin Indian Wells (California) leh Miami (Florida)-a title la indawt zat thinte sawina ‘Sunshine Double’ ni thei hmeichhiate zinga pangana a ni.
World number one Sabalenka hian set khat mah hloh loin final a thleng a, 2025 French Open final-a a ngam loh American Gauff lakah a tlawm leh mai ang em tih zawhna a pian mek laiin Hard Rock Stadium, Miami Gardens-a inbeihna lianah a dingchang zawkah a tang a, Butch Buchholz Championship trophy a humhim.
Miami Open hnehna tluantling a chan leh hnuah kum kal laia Sabalenka record chu 23-1 niin, a chak loh awmchhun chu kumin January thla Australian Open final-a world number two Elena Rybakina a hneh loh chiah kha a la ni a, tun calendar kum kal mekah hian WTA Tour title pathum a la tling ta bawk.
Kum 27 mi Sabalenka hi kum 2019 leh 2021 champion Ashleigh Barty hnu lama Miami title tum hnih la zawn leh thei hmasaber niin, Covid-19 avangin kum 2020-ah he tournament hi khelh a ni lo a, a hma chiah leh a hnu chiah kuma champion Barty kha Sabalenka hmaa he title humhim thei hnuhnungber a ni.
Belarusian Sabalenka hma hian Iga Swiatek (2022), Victoria Azarenka (2016), Kim Clijsters (2005) leh Steffi Graf (1994, 1996)-te chu hmeichhe zinga ‘Sunshine Double’ hmasate an ni.
Miami Open men’s doubles final-ah Great Britain player Henry Patten leh a Finnish partner Harri Helioevaara laka 6-4 6-2 hnehna changin Italian pair Simone Bolelli leh Andrea Vavassori an champion ve bawk.
Nizan men’s singles final result tarlan hman lohah world number two Jannik Sinner leh Czech 21st seed Jiri Lehecka an intum a; Sabalenka ang thoin Italian Sinner hi Miami tournament hma chiaha khelh Indian Wells-ah khan a champion a, Miami khawpuiah hian a champ leh thei a nih chuan ‘Sunshine Double’ nen a sawizawm ve theih ang.