Miami tana a ‘start’ vawikhatnaah Messi vul nghal

Miami tana a ‘start’ vawikhatnaah Messi vul nghal
Lionel Messi chuan karliamta Zirtawpni khan bench atanga lutin a club thar tana a game hmasaber khelin last minute-ah chakna goal a chhuihlut a, Thawhlehni zanah a tumkhatna’n Inter Miami tan starting line up changin, sili faia Atlanta United an sawpna inkhelah goal hnih thunin, assist vawikhat a nei nghal.
Ti hian, Miami captain thar hian Major League Soccer club tana a game hmasa pahnihah goal thum a nei nghal thawt a, United States leilungah kum 36 mi ni tawh Argentina star a vul leh nghal.
Messi hian second half-a team-mate Robert Taylor-a goal tur a siamsak hma first half tir lam minute 22 chhungin goal hnih a puitlin nghal a; a goal hnihna a thun rualin Paris St-Germain forward hlui hian khelmual sira tan khawh club neitu pakhat David Beckham kawk chungin a goal thun a lawm nghe nghe.
A siamsak Taylor chuan Barcelona player hlui fakin, “Ball nen chuan engkim a ti thei a, chep tak karah pawh ball a keng thei a, a hun takah 100% in thutlukna dik tak a siam thei.
“Hun pum tih theih deuh thawin a team-mate tu emaw tal chawm turin a zawngchhuak thei zel a, team chhungah quality sang tak a rawn luhpui a, ka sawi awmzia chu khawvela player tha ber a ni.
“Hei hi a thiltih chu a ni – goal hnih a khung a, kan game hnuhnungberah pawh khan goal a thun tawh a, tunah assist a nei leh a, ani nena khelhdun hi mumang duhthusam a taka lo chang a ni,” a ti.
PSG-a a contract zawh hnuah karliamta khan Ballon d’Or chawimawina vawisarih dawng tawh hian a team-mate tharte rualin training a tan ve chiah a, US leilungah insiamrem nghah ngai loin goal a thun zui mawlh mawlh a ni.
2022 World Cup-winner hian kum hnih chhung French champion thuam a inbel lai khan game 75-ah goal 32 tilut tlingin, Ligue 1 lamah a khel zui tawh dawn lo tih a chian hnuah Arab ram lam atangin sum tam lutuk hlawh tura sawmna a dawng a, ram dang atang pawhin sawmna a hmu a, chu’ng zawng zawng chu hnawlin US-a inkhelh a thlang ta zawk a ni.
Thawhlehni zana a club thar tana luh hmasak a chan vawikhatnaah khan a Barcelona team-mate hlui leh MLS club-a mithar ve bawk Sergio Busquets nen inchawmtawnin tan atanga minute kuana lekah a goal hmasa zawk a thun a; minute 13 a liam leh rualin Finland midfielder Taylor nena thawkdun chungin a goal hnihna a hlawhchhuak leh.
Chawlhlawk hma deuhin Taylor hian mualneitu team goal thumna a thawh ve leh a; second half-ah kum 28 mi Taylor bawk hian Messi siamsak atangin Inter Miami goal lina leh he match-a goal hnuhnung ber ni zui ta a thawh ve leh.
Minute 78-a khelmual a chhuahsan laiin Messi hi inkhel entu mipuiin ‘standing ovation’ nen zahna an hlan a; Argentine a chhuah hnu hian seat 20,000 awmna DRV PNK Stadium-a fans engemawzatin khelmual an chhuahsan ve nghal nguah nguah!
Group stage match hnih an khelh tur zo felin Inter Miami an chak ve ve a, Gerardo Martino team-in Leagues Cup knockout stage an lut.
World Cup-style tournament khelh mek Leagues Cup hi MLS leh Mexico lama an top flight Liga MX team-te inelna a ni.
Inter Miami captain thar Messi
France ram atangin United States lamah a insawn hlimhlawt a, a club thar tana a game hmasaberah bench atanga a luh rualin captain armband a hreng nghal a, tun Thawhtanni khan Inter Miami coach Tata Martino chuan a captain nghet atana Lionel Messi a nemngheh thu a puang.
World Cup winner Messi hi tunthla tir lam khan Major League Soccer (MLS) club Miami chuan an senglut a; tarlan tawh thin angin, karliamta Zirtawpni khan a club thar tana a game hmasaber khelin captain armband a hreng nghal a, Leagues Cup match-a Liga MX team Cruz Azul an hnehna goal chu hun pekbelh tawp dawnah free-kick atangin a chhuihlut.
Argentine forward hian kephah hliam avanga hun rei tak chawl tur Brazilian midfielder Gregore a thlak a; Mexican club Azul an hneh hnu khan chanchinbumite’n Messi chu Miami captain atan a hmang zui dawn em tih an zawt a, coach Martino chuan captain banhren a hrentir chhunzawm tur thu a lo sawi tawh a ni.