Middle East buaina vangin tuialhthei harsa dawn lo – Puri

Middle East buaina vangin tuialhthei harsa dawn lo – Puri
Union Petroleum & Natural Gas Minister Hardeep Singh Puri-a chuan Israel-Iran indona avang leh US-in Iran a beih avanga Middle East-a buaina awm mek avanga India-a tuialhthei indaih lohna a awm mai hlauhthawnna awm chu sawi fiahin engmah chutiang harsatna chu a thlen phah dawn lo tih a sawi.
“Chawlhkar hnih liam ta atang khan Middle East-a ramte inepna boruak hi kan thlithlai reng a. Prime Minister Narendra Modi-a kaihhruai sorkar hian kum eng emaw ti kalta atang kan kan thil lak luhna kawng thlakin tunah chuan kan lak luh tam zawk hi Strait of Hormuz kaltlanga lak luh a ni ngai tawh lo,” a ti.
Ram chhunga tuialhthei hralh chhuaktu company 0 Indian Oil, Bharat Petroleum leh Hindustan Petroleum te chuan chawlhkar tam tak daih tur an chhek sa a, kawng hrang hrang atangin lak luh belh zel a ni bawk tih a sawi.
“Kan khua leh tuiten tuialhthei an chatlak lohna turin a tul ang apiang kan ti zel ang,” tiin minister chuan a sawi bawk.
Iran hi Strait of Hormuz/Persian Gulf hmar lama awm niin he kawng hi tuialhthei thawn chhuak tam ram, Saudi Arabia leh UAE atanga phurh chhuah ni tin barrel maktaduai 20-in a paltlang ziah a ni a. Iran chuan he kawng hi Israel nena an indonaah US a inrawlh ve avangin khar a tum a, he chanchin ziah lai hian thutlukna a la siam lo.
Middle East buaina hian Saudi Arabia, Iraq, Kuwait leh UAE atanga tuialhthei tnawn chhuahte a nghawng dawn ngei nia ngaih a ni a, a man pawh a to phah hle rin a ni a. Iran-in kawng khar a tum mek lai hian Yemen-a Houthi helho pawhin US-in Tehran a bei zui a nih chuan lawng beih an chhunzawm dawn tih an sawi ve mek bawk.
India hian tuialhthei a mamawh zawng zawng atanga 85% vel hi ram dang atanga a lak luh a ni a, a lak luhna man a san chuan tual chhunga a man pawh a pung nghal lo thei dawn lo va, chu chu eibara a than tithu thei a ni dawn a. Ram dang nena indawrnaa sum a hman tam chuan a pawisa hlutna pawh a tlahniam thei dawn bawk.
Hetih lai hian India hian a tuialhthei mamawhte hi Middle East ram atanga la lut lovin innghah nan Russia bakah US a hman ber a, hei hi nakin zel atana a ruahman a ni.
Union Minister Puri-a chuan tuialhthei leh boruakalhthei sawngbawlna hmunhma pawh tihchangtlun zel a ni tih a sawi a. A hmain ra, chhunga thlitfimna hmun 23 chu thuam thar niin kum khata petrol kaihhnawih thil siam chhuah metric tonne maktaduai 257 siam chhuak thei a ni tih a lo sawi tawh.
Minister hian a kaihhruai ministry hian tuialhthei dah khawlna siam lamah pawh tan a la tih a sawi a, hei hi rikrum a awm palh leh tun anga khawvela inepna boruak awma thil a harsat palha invenna atana tih a ni a. Hei bakah hian khawvel puma a man a san laia ram chhunga company-ten man tlawm zawka an khawl sa an hralh theih nana tih a ni bawk.
Minister chuan Pudur-a dah khawlna awmah 2.25 million metric tonne (MMT) dah theih a ni a, Visakhapatnam-ah MMT 1.33 leh Mangalore-ah MMT 1.5 chhek theih a ni tih a sawi a. Tuipui kam tho, Chandikhol-ah siam mek a ni bawk tih a sawi.