MIFCO-in Serthlum leh lakhuihthei sawr tan

MIFCO-in Serthlum leh lakhuihthei sawr tan
Chhingchhipa Mizoram Food & Allied Industries Corporation (MIFCO) hmunah serthlum leh lakhuihthei a tuia zawrh turin sawr tan a ni tawh.
Serchhip district Chhingchhip MIFCO hmunah hian 2024 December 27 atang khan serthlum hi sawr tan a ni a, serthlum hi Serchhip district Hualtu khua thar niin, Tui Bon Natural Pvt. Ltd. Chaltlang Aizawl-in laksak a, an ni hian Hualtu khuaa serthlum huan neitute atanga leiin, Chhingchhip-a MIFCO hian a lo sawrsak bakah phai lamah man man zawkin a pe chhawng dawn a ni.
December 27-a a sawr bul tanna telpuitu MIFCO chairman Lalthazuala Rawite chuan hunpui lai ni mah se, serthlum neitute leh a leitu turte remchan lai a nih avangin MIFCO-a thawktute nen ruahmanna siamin serthlum chu sawr a ni tih a sawi. Hun rei tak serthlum sawrna khawl hman loha awm tawh, hman leh theih tura an ruahmannaah thawktute fakawm a tih thu sawiin, hmun hrang hranga khawl leh hmanrua hman tangkai loha awm tawh chu ZPM sawrkar chuan kuthnathawktute tan tangkai takin a hmang dawn a, khawl siamthat ngai leh tih changtlun ngai pawh eirukna tel loin thuamthat tum a ni tih a sawi.
Chhingchhipa hmun nei MIFCO hian 2024 June atang khan sapthei tui sawr hna bul a tan tawh bakah lakhuihthei leh serthlum a sawr leh mek a, baibing leh rawtuai tin pawh siam theih a ni tih thawktute chuan an sawi.