Mihrang Zagallo a fam ta…

Mihrang Zagallo a fam ta…
Brazil tana Fifa World Cup champion team-a tum li tel tling thei awmchhun Mario Zagallo chu kum 92 mi niin a thi tih Inrinni liamta khan a official Instagram account kaltlanga tarlan a ni.
Football chanchina player leh coach ni chunga World Cup trophy hawn ve ve thei awm-chhun Brazilan football legend Zagallo hi a inkhelh lai chuan winger a ni thin a; kum 1958 leh 1962-a Brazil a champion zawn tum khan an player pawimawh niin, final-ah luh hmasak a chang ve ve.
Kum 1970 khan manager ni chungin world champion a ni leh a, khatih laia Pele, Jairzinho leh Carlos Alberto-te telna Brazil team kha international team chhuak tawh zawng zawnga ropui-bera ngaih a ni hial!
Zagallo World Cup trophy hnuhnungber chu kum 1994-a Carlos Alberto Parreira assistant coach ni chunga a sualchhuah kha a ni.
Khami hnu khan Brazil manager a rawn ni chho leh a, kum 1998-ah an ram chu final luhpui lehin, tournament thlengtu France an hneh zo ta lo a nih kha.
Tarlan tak angin, Zagallo hi player leh manager ni chunga World Cup trophy la thei hmasaber niin, a hnuah Germany legend Franz Beckenbauer leh France pa ropui Didier Deschamps-te’n an zui.
World Cup-a team hlawhtlingber Brazil-in title panga an lak theihna kawngah Zagallo hian a thawhhlawk a, Pele aiin langsar lo zawk mah se national team tana a hnathawh hi Brazilian-te tan chuan hriatreng a ni tawh ang.
Kum 1950 World Cup final match-a thenawm Uruguay laka tournament thlengtu Brazil tlawm tum khan khawvela stadium lian berte zinga mi leh hmingthang em em Maracana Stadium chhunga mipui 200,000 dawn zingah khan rawlthar ni chungin Zagallo hi a inzep ve tat tat a, khami tuma an team chak loh chungchang kha kum 2013-a BBC Sport-in an kawm tumin a sawichhuak a, “Kha ni zet kha chu ka rilruah a thi thei tawh lo,” tiin.
Kum 1958 tournament hma lawk khan kum 26 mi lai ni tawh chungin Zagallo hian a Brazil debut a nghakchhuak ve chiah a; national team-ah la mikhual teh mah se kum 1958 World Cup-a Brazil champion-na kawngah a thawhhlawk a, final-a an khingpui Sweden laka 5-2 hnehna an chan tumin goal lina a thun a, khatih laia rawlthar kum 17 mi Pele chuan Selecao tan hming a rawn chher tan ta bawk a ni.
Zagallo hi kum 1958 World Cup-a final khel Brazil player la dam awmchhun a nih reng hnuah kartawp khan a kal ve ta nge nge a ni.
A boot bun lai hun leh Pele hun innangin, 1962 World Cup stage tir lamah khan Pele a inhliam hlauh a, tah chuan Zagallo pawimawhna a rawn langsar zual leh a, khatih lai kha forward lama tankhawhte’n tlarhnung ven an la buaipui zen zen loh lai a ni a, Zagallo erawh chuan mittlung takin defence a pui a, final-ah Brazil chuan Czechos-lovakia an hneh leh ta a ni.
Kum 1965-a inkhelh a chawlhsan hma khan Zagallo hian America, Flamengo leh Botafogo thuam inbel chungin tualchhung football a khel a; ram tan match 33 a khel tling.
Botafogo enkawl chungin a managerial career a tan a; a hnuah kum 38 mi lek ni chungin Brazil boss nihna a luah chho a, Joao Saldanha a thlak a, Mexico rama 1970 World Cup-in a zui nghal.
Tactic thiam hmingthanga sawi ni kumkhua Zagallo hi hminglemah ‘The Professor’ tih a ni a, chubakah ‘Old Wolf’ tih chu mite koh dan pakat niin, national team a enkawl lai khan attacking talent kawl hraw rualkhat – Pele, Jairzinho, Gerson, Tostao leh Rivellino-te chhawr tur a nei a, midangte tana team hlauhawm a dinchhuak.
Mexico ramin Fifa World Cup a thlen tum khan a hoa chhuak Brazil chu an game khelh parukah chak vekin, final match-ah 4-1 ngawtin Italy an sawp.
West Germany-in 1974 World Cup a thlen tum pawh khan Zagallo hi Brazil coach a la ni a, mahse, tah kha chuan palina a nihpui pha ta chauh a ni.
A hnuah Brazilian club thenkhat a enkawl zui a, chumi piahlamah Kuwait, Saudi Arabia leh United Arab Emirates telin national team a enkawl zui leh a; kum 1990 khan a tumkhatna atan UAE chu World Cup a thlenpui nghe nghe.
1994 World Cup-ah khan Brazil squad-ah a tel leh a, Parreira coaching set-up kan hmuhah khan coordinator hna pek a ni.
Kha mi World Cup-ah khan Italy nen final match hun pangngaia goal an thun zawh loh ve ve hnu penalty shoot out-ah 3-2-in Parreira team an vannei ta zawk a; kum 1970 hnu lama Brazil kuta world title a luh leh vawikhatna a nih bakah world champion tumli an nihna chiah a ni nghe nghe.
‘Idol of Brazilian football’ an tih mai Zagallo team Brazil kha 1998 tournament-ah pawh champion tura rinkai an ni leh a, mahse, a thlengtu France lakah sithum faiin an tlawm a, khatih laia an star striker Ronaldo khan beisei a pha lo a, final game-a a fitness tha ta lo tlat khan mi mak tih a hlawh hle a ni.
Japan leh South Korea-in 2002 World Cup an inthlentawm tum khan Brazil kutah a tumngana atan world title a lut a; khami tum pawh khan special adviser niin Zagallo chu Brazil team-ah a la tel zui ta fan a, Luiz Felipe Scolari chu head coach a ni thung.
Kum 2006 World Cup a herchhuak a, Parreira assistant ni chungin Zagallo chuan tournament a hmachhawn leh a, France ngam loin quarter-final stage-ah an tla a, Zagallo pawhin coaching a chawlhsan ve ta nge nge a ni.
Kum 2012 khan Zagallo hi fa pali hrinsaktu a nupui Alcina de Castro chuan kum 57 mi lek ni chungin a thihsan a, tunah amah pawhin mual a liam zui ve ta a ni.
Tarlan tak angin, Inrinni khan a official Instagram account-ah Zagallo thih thu tarchhuah niin, “Lungngaihna thuk tak nen four-time world champion Mario Jorge Lobo Zagallo thih thu puan a lo ngai ta.
“A fate tana pa nih tling, pu duhawm, makpate ngaihsak mi, thian rinawm, hnehna nun nei professional leh mihring ropui a nih piahlamah giant idol a ni a, hlawhtlinna ropui hnutchhiah chunga hnam pasaltha a ni,” tiin thlahna an ziak.
Brazilian President Luiz Inacio Lula da Silva pawhinZagallo thlahna thu tichhuakin, Twitter thlaktu X-ah an then tak chu football player leh coach ropuiberte zinga pakhat a nih thu leh bansan ve ngai lo Brazilian nihna phochhuaktu tiin a sawi a; hmangaihna, inpekna leh hnehna a lantir thinte kha an ram pumpui leh khawvel tan zirlai tling a nih thu a tarlang tel.
Brazilian Football Confederation (CBF) president Ednaldo Rodrigues pawhin an legend zinga pakhat kalbo ve leh ta chu CBF leh Brazilian football-in a sun takzet tih sawi chungin CBF chuan an football idol pakhatin mual a liam avanga hun lungngaihthlak an tawh mek karah Zagallo chhungte leh fans a tawrhpui tih a sawi.
Fifa president Gianni Infantino pawh a tawngchhuak a: football, a bikin Brazilian foot-ball-a Zagallo huhang chu a lian tih sawi chungin, “An mamawh lai takin Brazil chuan damdapa inlan thin ‘The Professor’ chu an chuanna lawng khalhtu atan an lo hmang tawh thin a, tactic remkhawm kawnga mi bik chu.
“Brazilian football godfather tia hriat reng a hlawh tawh dawn a, a awm ve ta lo tur hmunruak hi mi zawng zawng tan a zau dawn em em a, a bik takin Fifa hian a ngai zual dawn a ni,” tiin.