MIHRING HRIAT TUR CHIN A AWM ANG EM?

Rev Dr Ramengliana

Book Fair leh lehkhabu man discount hun nuam ti ta reng reng chuan lehkhabu chhiar meuh loh tur lei te pawh a lo awm ve thei a. Chutiang lehkhabu zingah chuan Russell Stannard, The End of Discovery tih kha a tel tep a, keini ang tan chuan a scientific lutuk kha chhiar tui a har hle a ni. Ka chhiar chhuak ta hram niin ka hria. He lehkhabu ka lei chhan kha, a lehkhabu hmelhmang nalh ka tih vang leh a bu hming atang renga a chhung thute ka hriat chak vang kha a ni ber a. Ka lo hriat lawk lem loh zawk chu a ziaktu Russell Stannard hi Scientist turu deuh mai a nih kha a ni. British high-energy particle physicist, ama kawng zawh lamah chuan thleng sang ber pawl a ni ve hial awm e. A thu leh hla rilru tawk deuh a awm nual mai. Scientism laka mite chhan chhuah a tum hlauh
Russell Stannard hi scientist ngan ber pawl ni mah se science hi a ‘pathian biak’ hauh lo tih a chiang a. He lehkhabu a ziah chhan pawh hi science ngaihsan uchuak avanga hringnun kawng engkim hrilhfiah theih ang deuhthawa an ngai thin hi a duh lo hle a ni tih Thuhmahruai atangin a hriat theih a. Science hian tih theih chin a nei a, chhui phak loh chin a nei bawk tih hi a hmu chiang hle. Chuvangin science hian hriatna hnar dang kan neihte hi hnualsuat mai lo turin a duh thin a ni. A lehkhabu ngei pawh hi “Science hian engkim min hrilh thei dawna ngai an tam tawh a, chutiang ngaihdan awmze nei lo tak mai sut darh chu he lehkhabu ka ziah chhan a ni,” a ti mai a ni. Science leh Scientism danglamna hria a, hriatna leh thiamna kan zawnna kawngah mihring nihna pumpui kan kalsal loh a pawimawh khawp mai.
Science hian a theih chin a thleng ang
Science hian thil pawimawh tih tham a hmu chhuak meuh tawh lo anga ngai an awm thin a, chutiang chu Russell Stannard-a tanfung a ni lem lo. A ni chuan thil hmuh chhuah tangkai leh ropui tak tak la awm zel turah a ngai thung a. Mahse, mihring hriat theih chin erawh kan thleng tituai tawh niin a sawi. Kawng tam takah hmasawnna tur la inhawng mah se hma lam pan theih mumal tawh lohna pawh a lang ruak ruak tawh thin. Chutiang lam chu a lehkhabuah hian a sawi nual a ni. Science thiltihtheihna hian chin a nei a, chu chu kan thleng tep, a bak hi chu science theihnain a pha tawh lo, a ti a ni ber. Hetianga ngaihdan a neih chhan chu – mihring thluak ngaihtuahna hian a pha dawn lo niin a sawi.
Evolution Theory-in a kalh (?)
Evolution theory an tih hi a dik a nih chuan mihring thluak chu a hman tangkai atana awm a ni mai a. A khawsakna pangngai, chi inthlahpunna leh a mamawh a thawh chhuahna tura awm a ni a. Vawiina kan hriat tam tak Big Bang theory tih te, DNA tih te, Atom tih angreng kan hriatna thuk tak lo awm ta hi – mihring nunphung pangngai atana tangkai lutuk lem lo kan thluak lo thang lian avanga kan hriat ve chauh a ni a. Mamawhna avanga thluak insiamtha zel tur chuan a mamawhna tak kha a lian lo a ni lawm ni? Tawp chin a nei ngei dawn e, tiin Russell Stannard hian ngaihnawm takin a sawi. Hei hi evolutionary theory chak lohna pakhat pawh a ni thei hial awm e. Mihring rilru hi mihring taksa hnathawh pakhat a nih mai chuan tawp chin a nei ngei awm si a.
Science hian a ban phak vek lo vang
He Physicist-in a sawi pakhat chu engkim hriatna hmanrua hi a neih pawh kan nei thei dawn em ni? tih hi a ni. A hmanrua a awm chuan hriat belh theih zel dan chu a awm a, mihringin siam theih zel turah a ngai lo. Ani nuclear physics lama mithiam a nih angin ama research huangah a sawi chiang hle a. High energy nuclear physics lama an research hi a hlawhtling thin hle. Hetiang research hi accelerators an tih chhunga atom particle te insuttir avanga thil an hmuh chhuah thar thin a ni a. Chutiang accelerator chu an tih len apiangin hmuh chhuah belh an nei ziah si a, engkim hre turin engtianga lian nge an mamawh ang le? Tuna khawvela an accelerator lian ber chu a tlang bial Km 27 lai a ni. Tunlaia theory lar zinga pakhat chu ‘String Theory’ hi a ni a. He theory hian thil reng reng hi a tawpkhawkah chuan ‘string’ (hrui) te lutukin a siam vek niin an sawi a. Chumi chu zu finfiah tur chuan accelerator kan mamawh len zawng chu kan Galaxy tiat hi a nih lawih a ngai dawn a ni! Engkim hriatna hmanrua hi kan neih har hmel ngawt mai maw!
Mihring hi engkim hre tura tih kan ni em ni?
An lo pawm dan leh duh dan a sut buai thin avangin thenkhat chuan ‘hriat tam hi a buaithlak’ an ti liam satliah thin a. Kan hriat tura tih leh kan hriat awm tak tak mahni inthlahdah leh nunphung thlak danglam hreh avanga kawng awlsam zawk zawha mawl taka awm reng hi a hrisel lo thei viau a ni. Amaherawhchu, tunlai khawvel science thiamna ril leh nasa lutukin engkim mai hriat kilhkelh a tum ta lutuk erawh hi chu ngaihtuah tham tak a ni. Siamtu min siam dan pawh a ni lovang tih a ngaihtuah theih hial. Evi leh Adama te kha ‘chhia leh tha hriatna’ thei ei lo tura tih an nih kha hre reng ila. Mihringte hian kan hriat loh tur thil hi hriat tumin hun kan hmanhlel fo tih chu kan hre thiam mai ang.
Scientist turu tak takin atom chakna an han thunun thiam a, Atom Bomb an siam tak te hi hringfaten kan hlawkpui ber em? Inhnial theih tak a ni ang. Tunhnaia Genetical Engineering an tih hmanga mihring taksa bung hrang hrang a mal mala siam an an tum ta te. Plastic surgery hmangin hmel a tihthat theih tawh avangin, ‘sum ngah ngah hmel tha’ a takin a lo thleng tak tak dawn ta te! Artificial Intelligence (AI)-in kan nun dan phung a thlak danglam dan tur te hi ngaihtuah tham tak a ni. Mipa hmeichhia anga an siam theih tak leh hmeichhia mipa anga an siam theih takte hian engang takin min tibuai chhunzawm zel ang maw? Thiamna leh finna hi kan chhawr em em lai hian kan dai loh tur chin chu a awm ngeiin a hriat theih a nih hi maw.