April 14 khan Iran in drones, ballistic missiles leh cruise missile te hmanga Israel beiin a phuba lakna a nih thu sawiin chu chuan Middle East-ah indona turu zawk a chawhchhuah hlauhna a lian hle a. Israel sipaite chuan Iran-in ralthuam chi hrang hrang 300 chuang hmanga a beih thu sawiin mahse heng zinga 99% te chu an kahthlak thu a sawi thung.
Rear Adm. Daniel Hagari chuan Iran chuan drones 170, curise missiles 30 leh ballistic missiles 120 hmangin Israel a bei a ti a. Ballistic missiles thenkhatte chuan Israel territory lutin air base ah tihchhiat a nei nel nual a ti bawk.
Missile strike avang hian southern Israel a Bedouin Arab khuaa hmeichhe naupang kum 7 mi chuan hliam na tak a tuar tiin chhanchhuaktu pawl te chuan an sawi bawk.
US President Joe Biden pawhin Washington-ah Israel chuan drone leh missile tam ber te chu a lo kap thla vek tiin a sawi bawk.
Iran-in Israel a beihna chhan hi kar hnih kaltaa Israel-in Syria khawpui Damascus a Iranian consulate building missile hmanga beia Iranian general pahnih tena nunna an chanphahna phuba lakna a ni a. Tun hi Iran-in direct a Israel a beih hmasak ber niin kum 1979 Islamic Revolution atang tawha inhmelma bur tawh an ni.
Iran chet dan chu United Nations chief in sawisel nghalin France pawhin Iran chuan ‘military hmanga inbeihna nasa zawka thlentir thei’ tiin a sawi a. Britain chuan ‘pawisak nei lo’ tithungin Germany chuan Iran leh a proxy te chuan an chetdan an titawp nghal tur a ni a ti thung.
Rear Adm. Hagari chuan missile tam ber te chu Israel ramri pawnah danchah an nih thu sawiin cruise missile 10 te chu warplane ten an kap thla tiin a sawi bawk.
“Iran chet dan hian buaina nasa zawk a thlen thei a ni” tiin Rear Adm. Hagari chuan a sawi a. Israel Army te chuan Israel ram security humhim turin tihtur tul leh pawimawh an ti mai dawn a ti bawk a. Israel indo thlawhna te chu vansangah an la awm teuh tiin a sawi bawk.
Israel sipaite chuan an Arrow system, atmosphere pawna a awm laia ballistic missile te kap thla thin chu Iranian beihna tam ber lo dangtu tiin chu mai bakah ‘strategic partner’ in min pui a ti bawk.
“Ka thupek angin Israel humhim nan US military te chuan aircraft leh ballistic missile defence destroyer te chu tun hnai karah helai region-ah hian chhawpluh a ni” tiin Biden chuan thuchhuah a siamah a sawi a. “Chung kan hmalak tawhna te leh kan service member te skill te avangin Israel beihna drone leh missile tam ber te chu kan kap thla thei a ni” tiin a sawi.
US Defence Secretary Llyod Austin pawhin thuchhuah a siamah US sipaite chuan Iran, Iraq , Syria leh Yemen atanga missile leh UAVs te Israel beih nana kahchhuah te chu tam tak a dang chat a ni tiin a sawi bawk.
Biden leh Israeli Prime Minister Benjamin Netanyahu te chu Pathianni khan inbiakna nei zui nghalin chutah chuan Biden chuan America chuan Israel chu a thlawp bur thu a sawi nawn leh a ni.
Iran chuan April 1 a Syria rama a consulate a beih avangin phuba a lak tur thu a lo sawi lawk sa tawh a. Consulate building beih chu Tehran chuan Israel thiltih a tih laiin Israel chuan tawngkam engmah chhakchhuah a la nei lo thung.
Israel leh Iran te chu Israel in Gaza a militant te laka indo thla ruk a kalpui chungin an inbakaih char char tawh a. Gaza a indona awm chhan chu October 7, 2023 a Hamas tena Israel ramri luta mi 1,200 tihluma saltang mi 250 an lak vang a ni. Israel in Hamas te chu bei zuiin thlaruk chhung velin nunna chan 33,000 chuang an awm tawh niin local health official te chuan an sawi.
Israel-in Gazaa runa Hamas te a beih hnu lawkah Iran thlawp Lebanona inbun militant group Hezbollah te chuan Israel hmarlam an bei zui nghal a ni. Iran thlawp thu Iraq, Syria leh Yemen a militant group te pawhin rocket leh missile-in Israel an kap chamchi bawk.
Iran state-run IRNA news agency chuan Revolutionary Guards te chuan Zionist regime te ram awp mekah drones leh missiles a kapchhuak tiin a puang bawk a.
Revolutionary Guard te chuan US pawh vauin, “Terrorist US sorkar hian Iran interest kalh zawnga inhnamhnawihna a nei a nih chuan Iran armed forces ten a phutawk hremna an pe ang” tiin an tarlang bawk.
Israel hian multilayered air-defence network thatak neiin long-rang missiles, crusie missiles, drone leh short-range rocket te pawh lo dangchat chat chat thei a nei a. Mahse, tuna Iran-in a ruala tam tham tak maia a beihvak angah hi chuan kahthlak hmaih kaltlang te pawh awm thei a ni tih a ni.
Iran hian drones leh missile thahnem tak neiin Ukraine indonaa Russia in a hman ber pawh Iranian drone Shahed-136s a ni. Heng drone te hian bomb an keng tel thei a, mahse, an thlawk muang thung.
Israel Army’s Home Front Command chuan school Sunday neih thulh tur tiin mi 1,000 aia tam punkhawm a khap bawk a. Israel leh a thenawm ram thenkhatte chuan an airspace an khar bawk.
Israeli prime minister Benjamin Netanyahu chuan, “Tu pawh min tina tu chu, kan ti na ve ang” a ti zui nghal a.
Washington ah pawh Biden chuan National Security COuncil meeting a ko nghal bawk a. US militarty Central Command head Gen. Erik Kurilla chu Israeli defence official te nena inbiaa Israel a cham mek lai ani bawk a. Central Command hi Middle East a US sipai te enkawltu ber a ni.
United Nations a Iran’s mission chuan Israel leh US te chu vau nghalin ‘Israel in tihsual a nei leh a nih chuan Iran chhanletna chu a nasa tawh ngawt ang’ a ti zui nghal a. “He buaina hi Iran leh Israel buaina a ni a, US chu a inhnamhnawih tur a ni lo” a ti bawk.
Iran in chetlakna a neih hma hian Iranian official te chuan phuba an lak tur chu an sawi chamchi tawh a, chung zingah chuan Supreme Leader Ayatollah Ali Khamenei pawh telin Israel chu hrem tur a ti a ni.
Iran capital Tehran-ah thung chuan Pathianni khan gas station ah mi tam tak intlar nghalin buaina nasa zawk a chhuah hlauhna an nei a. Chutihlaiin hard-liners te chuan Palestine Square ah an sorkar chetdan thlawpna lantirin an pungkhawm thung.
-- Advertisement --
Israel chhan let theihna?
Israel chuan Iran-in missile hmanga a beihna chu a chhanlet ngei tur thu a sawi nghal a.
Engtiangin nge a chhanlet ang tih chu zawhna awm mek a ni a, Israel military leh war cabinet te chuan an ngaihtuah mek a ni bawk a.
Israel target ni thei awm bera ngaih chu chung missile te kahchhuahna hmun Iranian base te chu a ni.
Chu aia nasa chuan Israel chu kal theiin Iranian military base leh Revolutionary guard Corps te training centre hrang hrang te beiin thil tam tak a tichhe thei a, nunna chan tam tak an awm phah thei bawk.
Chutiang a thleng a nih chuan Iran chuan a chhang let lo thei dawn lo va, buaina nasa zawkin a alh zel mai dawn a. Hei vang tak hian Middle East a sorkar hrang hrang te chu Israel in chhanletna pek dan tur ngaihtuahin an awm mek tia sawi a ni bawk.
Hetih lai hian UN Secretary General Antonio Guterres chuan Iran in Israel a bei chu a dem thu sawiin ram pahnihte chu insum turin a ngen a.
“Indona nasa zawk Middle East hmun hrang hranga a chhuah loh nan insum turin ka ngen che u a ni. Ka sawi tawh angin helai region emaw khawvel emaw hian eng indona mah hmachhawn a zo lo” tiin a sawi.
Hetih lai hian Iranian President Ebrahim Raisi chuan Pathianni khan an phuba lakna chu a zo tawh a ti a. Israel in a chhanglet leh a nih ngat chuan a aia nain chhanletna pek nghal a ni ang tiin a sawi bawk.