Mihring upa berin kum 117 a tling ta

March ni 4, 2024 khan khawvela mihring damlai zinga upa ber Maria Branyas Morera chuan kum 117 a tling ta. Maria hi San Francisco, USA-a March ni 4, 1907 khan a piang a, kum riat a tlinin a chhungte hian Spain-ah haw pui lehin, Catalonia-ah an inbengbel zui ta a ni.
Maria hi Catalonia-ah hian a cheng zui ta reng a, mahse, tun kum 23 chhung chu nursing home-ah an awm ta a ni. Lucile Randon, kum 118 a thih hnuah Maria hi January 2023 atang khan khawvela mihring damlai zinga upa bera puan a ni ta a ni.
Maria hi a beng a chhet deuh tawh a, wheel chair hmang lo chuan a che sawn thei tawh lo tih loah chuan taksa hriselna lamah harsatna em em a la nei lo a, a rilru leh ngaihtuahna te pawh a la fim tha hle niin a enkawltute chuan an sawi a, tunah hian researcher ten damreina chungchang a scientific testing an tih theihna turin a inpe tawh bawk a ni.
Maria hian Spanish Flu pandemic 1918 bakah Spanish Civil War (1936-39) te pawh a lo paltlang tawh a, heng te hi a hun tawna hun rapthlak a tih berte zinga mi an ni. 1931-ah Catalan doctor Joan Moret nen inneiin, fa pathum an nei a, a pasal hi 1976-ah a boral a, a fa pathum zinga mipa awm chhun August chu kum 86 mi niin, tractor accident-ah a boral tawh bawk.
Maria hian COVID-19 pawh khan a tuar chhuak a, 2020 khan kum 113 mi niin he hripui hi a kai ve a, a hunlaiin COVID-19 hripui kai damchhuak leh zinga upa ber a ni a, mahse, he record hi chu a hnu deuhah ani aia kum thuma upa zawk Lucile Randon-i’n a rawn khum ve leh ta a ni.
Maria hi a tu leh fate puihnain X (Twitter)-ah a active ve viau a, thla kalta khan X-ah hian a thih hun a hnaih ve telh telh ni a hriat thu a post a, chuti chung chuan khawvel leh nun hi a êng zawngin a thlir thiam hle a, a kum tam tawh hle mah se ni tin thil thar zir tur a awm zela a hriat thu a sawi bawk.
Maria hi chhin chhiah theih china khawvela mihring piang tawh zinga damrei lamah 12-na a ni mek a, kum 118 a tling thei a nih chuan 5-na a ni pha ang. Khawvel mihring piang tawh zinga chhinchhiah theih china damrei ber chu French mi Jeanne Calment niin, kum 122 leh ni 164 a dam a ni.