Miin a tum chuan ruihhlo a sim theih – K Sapdanga
Miin a tum tak tak chuan ruihhlo hi a sim theih ngei a ni tih chu thil chiang tak a ni tih Home-a ruihhlo vanga awm mekte hnenah Home minister K Sapdanga chuan a sawi.
Operation Kingdom Ministry (OKM) Phunchawng chuan Inrinni khan an annual sports an khar a. Hmanpuitu Home minister chuan Excise & Narcotics minister nen an mawhphurhna an lak phat atangin ruihhlo lo luh tamna Champhai lam an tlawh a, engtin nge thalai tam tak run mektu ruihhlo hi kan ramah tun aia nasaa kan do ang, tih an ngaihtuah tih a sawi.
Tunhmain tlawmngai pawl atangin hotute hnungzuiin a hmalatu pawlah a lo tel ve tawh thin a, tuna a rilrua awm ta ber chu, kan duh vang reng ni lo engemaw avangin sual khurah kan tlu thin a, ruihhlo bawiha kan tang chhuak tur hian tum tlatna a awm a ngai niin a hria tih sawiin, “Nghei theih loh, sim theih loh thil hi a lo awm tak tak loa, miin a tum tak tak chuan a sim thei ngei a ni tih hi thil chiang tak a ni. Vawiina ruihhlo bawiha tang mekte pawh kan damna turin eng harsatna emaw Pathianin kan chungah a dah a, heng harsatna kan tawh hi min ti chheltu lo ni mawlh se. Sawrkar pawhin a tum lian ber chu nun kawng dik kan zawh theihna tura dan kenkawh, hrem ngai hrem, siamthat ngai siamthat a ni a, chu tho chu Excise & Narcotics Department pawhin an tum a ni. Vawiina helaia awmte ka fak che u a, in nihna in pawm a, damna duhin helai hmun in pan a ni. Sawrkar ang pawhin he hmunah hian kan theih ang ang ti turin kan inhawng a ni” a ti.
An camp chu Pathian ngaih chuan kohhran ropui tak a ni a, damna zawnga punkhawmna hmun a nih avangin thlarau thianghlim pawhin hna a thawk zel ang tih a ring tih K Sapdanga hian sawiin, “Bible hi han chhiar han chhiar ila, hmangaihna hi a bul a ni. Harsatna kan tawhna hmunah leh natna hrang hrang kan tawhna hmunah pawh Pathian hmangaihna hian min thlahthlam lo tih a lang chiang hle. Sum leh pai, hriselna pawh hi hlimna a lo ni chiah loa, hlimna chu Pathiana mi a innghah tlatna hmunah a awm thin. Engkim tuar chhuak turin inbuatsaih ila; taksa, rilru leh thlarau damna chang a, damna famkim nen he hmun rawn chhuahsan theuh turin duhsakna ka hlan che u,” a ti.
OKM hi Lalruatpuii din a ni a, tunah thawktu 40 vel leh zirlai 400 vel an awm mek.