Mikhual ngah Zokhawthar

Champhai District-a Zokhawthar hi mikhual ngah khua an ni a, kum tluanin mikhual a sang tel an nei thin. Tunah pawh mikhual a sang tel an lut khawm leh mek.
He khua hi Mizoram state khaw tawp khua an ni a, |iau kama awm niin, |iau kam lehlam chu Myanmar khaw hmasa ber Khawmawi khua a ni. Myanmar lamah tlanchhia an awm changin Zokhawthar hi an pan ber a, awm nghal an tum lo a nih pawhin an paltlang a ngai tho.
Chawlhkar liam taah khan Champhai District dep Myanmar lam hi an buai a, pawl pahnih an inkah avangin mipui an tlanchhe nasa. Zokhawthar an pan tlangpui a, raltlan lut thar hi mi sang hnih chuang fe an ni.
Inrinni tlai lamah khan chhinchhiah theih chinah raltlan lut thar hi mi 2529 an ni a, hetah hian naupang an tel loh bakah puitling pawh chhinchhiah loh thahnem tak an awm turah ngaih a ni.
Chawlhni khan raltlan lut thar engemaw zat an la awm a, an tam lam hi hriat theih a ni rih lo. Zokhawthar atanga thu dawn danin, Chawlhni-a raltlan lut tharte hi Rihkhawdar khaw mi an ni tlangpui a, Rihkhawdar bul velah hian an inkap leh a ni. Inrinni zan thlenga raltlan lut tharte kha chu Khawmawi mi an ni tlangpui.
Zokhawthar-a raltlan lut tharah hian a tam zawk chuan chhungkhat laina an bel a, belh tur nei lote chu khawtlang hruaitute remruatnain hall remchangah awmtir rih an ni. Hall-a awmte hi thalaiin eirawng an bawlsak a, an mamawh tur te pawh mipuiin an thawhkhawm a ni. Zokhawtharah hian raltlan awm sa a sang tel an awm bawk.
Zokhawthar hi in 800 vel an ni a, Khawmawi hi anni aiin an lian. Khawmawi mipuite hi an tlan chhuak deuh vekah ngaih a ni a, Khawmawi bakah Rihkhawdar atanga lut tharte an thleng khawm leh mek.
Kum hmasa lama raltlan engemaw zat Zokhawtharah hian an awm a, mi in luaha awm leh camp pahniha awm an ni. Anni hi chu buaipui an ngai tawh lo a, ei leh bar pawh mahniin an inngaihtuah thei tih thu dawn a ni.
Tun tuma raltlante hi khawtlangin an lo tuamhlawm bakah Champhai district thuneitute’n an vil a, blanket leh silpaulin pawh engemaw zat an sem.