Milan derby hneh chunga champ Inter
Derby della Madonnina an tih mai Italian top flight-a inkhel ngaihven hlawh kumkhuaah Pathianni zan khan San Siro luahtu team hnih intawngin, AC Milan laka 2-1 hnehna nen Inter Milan chuan league khelh nga la awmah Serie A title an hlawhchhuak.
He result hmang hian khelh 33-ah Internazionale hian point 86 hmuin, anmahni hnaihbertu Rossoneri lakah point 17-in an sang a, hmakhalh ngaihna an awm ta lo a ni.
Milan derby boruak tang zetah hian hun pekbelh a kal mek laiin player pathum hnawhchhuah an ni a; Inter-in player pakuain a hmawr an bawk a, Milan-in player 10-in tawpna hamrik an nghak thleng ve bawk.
AC Milan player Theo Hernandez leh Inter player Denzel Dumfries intibuai chu hun pekbelh minute thumna a kal mek laiin hnawhchhuah an ni a; a hnu deuhah Inter captain Davide Calabria pawh tharum thawh vangin hnawhchhuah a ni zui ve leh bawk.
Nerazzurri chakna goal hnih hi Francesco Acerbi leh second half tir lama Marcus Thuram-te thawh niin, minute 10 la awmah English player Fikayo Tomori chuan Milan siphurh pakhat zawk sut thenin a team tan beiseina tawite siamsak bawk mah se Inter champion tur dalna khawp a ni ta lo.
Pathiannia an champion fel hnuah Inter Milan chu Italian ttile la hnem ber dawttu niin, vawi 20 an champion-na chiah a ni a, an hnuai chiaha vawi 19 champ tling AC Milan awmin, vawi 36 champion tawh Juventus an chungnung larh thung.
Tun hi kum 2010 hnu lama Inter-in Serie A title tum hnih an sualchhuahna niin, an champion hnuhnung ber 2021 kha Antonio Conte hun lai a la ni.
Kumin hi kum 116 zeta upa ni tawh Milan derby inkhel behchhana Serie A title a hmin tum khatna chiah a ni bawk.
Simone Inzaghi hnuaiah Inter Milan chuan khelh nga la nei chungin Scudetto an kuah fel hman a, league kal laiah game 27 an tlawm lo zawn mek nghe nghe.
Napoli kut atanga Italian title chhuhsaktu Nerazzurri hian season kal lai league khelh 33-ah goal 79 thun tling tawhin, anmahni hnaihbertu nen goal 15 ngawtin an chungnung a; an lamah goal 18 chiah la lut tlingin, an dawta chhuah tlem ber nen goal riatin an inthlau.
Milan derby hnuhnung paruk ngawtah Inter hi an chak fai vek a, derby bika Milan ropui vanglai kum 1911-1913 leh 1946-1948 daih tawha vawiruk ve ve an lo chakzawn hmasak tawh kha an nihrualpui ve ta a ni.
Milan derby hneh chunga champ Inter
Get real time updates directly on you device, subscribe now.
Next Post