Milan derby hnehtu AC Milan

Stadio Giuseppe Meazza-a Milan khaw team lian pahnih khel-mual intawm mekte inhmachhawn thlir tura mipui 75,627 zet pungkhawm hmaah Pervis Estupinan chuan goal awmchhun khungin, Inter Milan lakah Pathianni Milan derby bika mualneitu chan chang zawk AC Milan chu 1-0-in an chak.
Italian Serie A hmahruaitu Internazionale-in an hnuai chiaha pahnihna luahtu lakah point hlawhchhuak zo lo mah se Italian top flight-a a sang pahnihte inthlauhna hi point sarih lai a la ni zui ta tho a, Milan tan erawh title race-ah Inter an lang zuamawm deuh sawt tura ngaih a ni!
First half minute 35-a Fofana siamsak atanga San Siro-a goal awmchhun khungtu Estupinan khan nikum nipui thawt laiin Milan hi Brighton atangin a zawm a; Pathianni derby inkhel pawimawha a goal khat tihluh avangin Inter Milan chuan point 10 laia hma hruai fal theihna hun remchang an bawhpelh phah.
Tun kha season kal laia Milan-in hmahruaitu Inter an hneh vawi hnihna a nih bakah game 10 lai khelh hmabak a la awm avangin AC Milan tan Italian title race-ah beisei tur la awm tura ngaih a ni.
A zawna vawi riat an chak tluan pur pur hnua tawlhtlu ve zeuh Inter tan pawh nikum November thla league match thoa Milan laka an tlawm hnua an chak loh leh vawi khatna avanga han hnual em emna tur chhan awm bikin a lang lo!