Milan kutah Italian Super Cup a lut

Milan kutah Italian Super Cup a lut
Italian-ho pawhin Spanish football hnungzuiin sum tamna Arab ramah an tualchhung football-a inkhel chuangtlai (!) pakhat Italian Super Cup an khel a, Saudi Arabia khawpui Riyadh-ah Milan derby sawnin, Thawhtanni final match-a 3-2-a Internazionale hnehtu AC Milan kutah Italian Super Cup title a lut.
Milan manager thar Sergio Conceicao khan Paulo Fonseca thlakin nikum December ni 30-ah Milan a zawm a, a game hmasaberah a team thar chu Juventus lakah 2-1 hnehna chanpui chungin Super Cup final a luhpui a, a hna thar a chelh atanga a chawlhkar khatna leka Italian Super Cup title a lakpui nghal thei chu dangdai leh ropui a tih thu hahipin a sawi!
Arab ram inkhelah hian first half chhungin goal a lut dawn lo emaw tih tawh hnu hun pekbelhah Lautaro Martinez chuan Mike Maignan-a dan zawh loh goal khungin Inter Milan hmahruaina goal a khung a; second half tir lamah Mehdi Taremi chuan sihnih faia Inter hmahruaina goal thawh ve lehin, Milan fans thawm a reh duk!
Rei erawh an reh ta lo a, sihnih an chhuah tlin atanga minute nga a liam leh rualin Theo Hernandez chuan free-kick atangin Milan siphurh pakhat a sut er zawk a; minute 80-ah Christian Pulisic chuan Milan siphurh sut zoin, he mi hnu hian minute 10 chhung chu goal dang a luh belh ta lo a, penalty shoot-out rim a nam hman rum rum tawh tihah substitute Tammy Abraham chuan hun pekbelh minute thumna a kal mek laiin ‘comeback win’ thlentu goal a thawh ve leh a, AC Milan an nui hnuhnung ta zawk a ni.
Lazio, Inter Milan leh Parma midfielder hlui Conceicao hoa inelna an hmachhawn hmasakberah Milan-in title an hlawhchhuak nghal a; season liamta tawp ruala a chawlh thu a puan hma kum ruk chhung khan Porto manager ni chungin trophy 11 a lo la ve tawh bawk a ni.
Riyadh khawpuia an hnehna nen Milan-in Super Cup title vawiriat la tling awmchhun Inter record an nihrualpui chiah a, a zawna Inter Milan vawili champion-na tur kawng an dal nghal bawk.
Zirtawpnia Juve an paltlang hnu khan kum 50 mi Conceicao chuan pa nelawm tak a nih loh thu leh nui zen zen lo a nih thu a lo sawichhuak tawh a, mahse, final-a San Siro luahtu team dang an hneh meuh chuan trophy lawmin a player-te nen dressing room-ah an lam chiam!
Milan a enkawl hnua a game hnihna lekah trophy a lakpui nghal a, champion boruak sawiin, “Inkhelh ban rual khan player-te’n cigar zu turin min phut thu an sawi a, title lak ruala cigar zuk hi ka puithuna kalpui mek tih an lo hriat tawh vang a ni. “Coach ni chunga ka title 13-na a hmin thei hi ka hlim takzet a ni,” a ti.