Milem Biakna ‘Party Politics’ Bansan Rûnpui Kum

Rev. Dr. Zaichhâwna Hlâwndo

January ni 19, 2026 chhun dar 12 khan MJA Press Club, Aizawlah Zoram Thar Zofate Lairelna Inpui chuan kum 2026 hi Zofaten Milem Biakna Politics kalphung bansan runpui kumah kan puang a. Kum 2012-ah United Kingdom ah rawngkan bawl laiin “I pianna ramah missionary turin kir tawh rawh” tih kohna chiang tak ka dawng a. January 25, 2016 khan chu kohna chhang chuan England rama kan in leh lo, chhungkua leh rawngbawlna zawng zawng kalsanin ka pianna ramah chuan ka lo hawng ta a. Ka lo hawn atangin Pathian Lal Ram chanchintha tlangauvin Zoram dung leh vang kan fang a. Zofaten party politics hmanga rorelna siam tawh lo turte, hnama kan harh a tul thu leh Lalpa hnam thlante Lalpan a kaihthawhna turin chhum lo chat lovin kum 10 chhung chu theihtawpin hma kan la a ni.
Zofaten Kum 1946 atangin Milem biate awpbehna hnuaiah luh duhin milembiate tih danin party politics kan din tan a. Zofaten pi leh pute hun atanga rorelna fel fai tak – Lal leh Upate hmanga khawtlang rorelna duh lovin kan indo tan a. Party ding hmasa ber Mizo Union chhungkuaah pawh indona nasa tak piangin a phel leh nghal a. Kum 80 chhungin political party 23 chuang a ding tawh a ni.  
  Chu party politics chuan Zofate zingah indona nasa tak a siam a, rem lohna hian tawpintai a nei ta lo a, that theih miah lohna bawm chhungah kan lut ta a ni. Party politics chuan Zonun ze mawi a thiat a, a pawngsual a ni ber mai. Chu party politics chu Zofate Kristianna leh Bible zirtirna nen a inkalh tlat avangin kan Kristianna leh party politics chu a indo a, loh theih lovin keimahni leh keimahni kan indo ta a ni. He milem biate tih dana rorelna hian kan thlarau, rilru leh taksa a eichhia a, duhamna milem biaknain kan ram chu a luah khat ta a ni. He milem biakna hmanga rorelna tawp hun a thleng tawh dawn a. Pathian chhungte zingah rorelna tan a hun tawh a, Zofate kan sal tanna atangin Lalpan min hruai chhuak tawh dawn tih kan ring.
Party Sawrkar ni lo, Pathian Lal Ram Sawrkâr (PLRS) ‘God’s Kingdom Government’ a ding thuai tawh dawn tih hi kan beisei a ni. Zoram Thar Zofate Lairelna Inpui chuan Zofate – Zoram India, Zoram Burma leh Zoram Bangladesh a cheng zawng zawngte Lalpa tana inti thianghlim a, milembiate tih dana rorelna siam leh kalpui bansan vek turin kan ngenin kan sawm a ni. Lalpan min lo hriattir tawh angin kum 2028 Inthlan lo awm turah hian party sawrkar ni tawh lovin Lalpa Chhiahhlawh Intelkhawmte hmangin Pathian Lal Ram Sawrkar a pian ngei tawh kan ringin kan beisei a. Lalpa chhiahhlawh hna thawk tura kohna dawngte lo pen chhuak tawh turin kan sawm a, mipuite pawh party sawrkar siam tum tawh lova, Pathian Lal Ram Sawrkar din tura inpuahchah turin kan insawm a ni.
Zofate hi Pathian hnam thlan, hun hnuhnunga khawvel tana rah chhuak tur hnam kha kan ni a. Zawlnei Hosea hnenah Lalpa Pathianin Israel hnam 10 ten milem pathian Sebawng lim biaa an bawhchhiatna avanga khawvel puma a thehdarh tur thu te, a khawngaih tawh loh tur thu leh a mite a tih tawh loh tur thu a hriattir a. Chu a thusawi ang tak chuan Israel hnam 10 Zosefa chhungte chu khawvelah an darh ta vek a ni.
Keini hi tu dang ni lovin hnam bo Israel Zosefa chhungte = Zohnahthlak Zofate vek kan ni. Kum 2000 chuang kan bo hnuah tuna Pathianin kan chenna tura min pêk Zoram = Zosefa tu leh fate ram thar turah hian min dah a. Zosefa chhungte ram Ephraim tlang ram thar tura Lalpa ruat lawk ram a ni. Zawlnei Hosea hnenah hnam bo Israelte hun hnuhnungah a zawnchhuah leh tur thu te, a khawngaih leh tur thu leh a mite ni tura buatsaihin a siam thar a, an Pathian a nih leh tur thu a sawi ang khan Chanchintha hmanga min zawng chhuak leh turin Rev William William kum 1891 khan a rawn tir a. Kum 1894 ah missionary pahnih J.H. Lorrain leh W.F. Savidge ten min rawn thutchilh ta a, kum 50 chhung lekin Zofate berambo chu an rawn zawng hmu leh ta a ni.
Pathianin min pek ram thar Zosefa chhungte chenna ram thar Zoram chu a nihna tur angin a piang hnai tawh a, hnam thianghlimte din thar a, tlang thianghlim chu tundin a hnaih tawh avangin, Zofate kan intihthianghlim a hun ta a ni. Kum 2026 hi party politics bansana, PLRS tana inbuatsaih rûnpui kum a nih tawh avangin, Press Conference neiin Zofate zawng zawng hriat turin kan tlangau ta a ni. Pathianin min then thianghlim a duh a, politics thianghlim hmanga ama lalna ram din a tum tawh a ni.
Lalpa thu awih a, party politics bawlhhlawh sum hmanga MLA nih inchuhna te, dik lo taka sum siamna te, block leh unit hruaitu nih inchuhna te, party chhunga nihna leh sum inchuhna te, party dangte nena indona te hi kan bansan a hun ta a ni. Nehemian Judate hnenah Jerusalem kulh chim rem rum din tha turin a sawm a. Mipuiten “I thovang u khai i din teh tak ang u” an tih ang khan, kan ram tluchhe mek Lalpan min tundinsak turah hian a thawhpui leh a chhiahhlawh ni turin i inpe vek tawh ang u tiin kan insawm tak meuh meuh a ni.