Miley Cyrus pualin Hollywood Walk of Fame-ah arsi an dah ta

Miley Cyrus, kum 33, puala Hollywood Walk of Fame-a arsi chu an hawng ta a, a arsi hawnnaah hian a nu Tish Cyrus leh a laizawn Brandi Cyrus leh Miley pasal hual Maxx Morando ten an tawiawm a, a pa Billy Ray Cyrus erawh Miley puala hun lawmawmah hian a tel lo a, mahse, Miley hian a pa hming a lam chhuak tho e.
Miley chuan, “Ka pain inchhawng sang din turin a bul tan nan tuboh a chhut te a ngai a, chutiang tho chu Walk of Fame-a arsi nei tur pawhin a ngai. Chakna leh thahrui lam a ni lo a, teirei peih lam a ni. He arsi hi ka tana a pawimawh em emna chhan chu inpekna tling khawm a nih vang a ni,” a ti.
Miley puala arsi hawnnaah hian a thiantha Hollywood star Anya Taylor-Joy leh fashion designer Donatella Varsace te pawh an tel.
Miley leh a pa hi an inkar a tha vak lo thin a, 2025 ppodcast-ah pawh hei hi sawi chhuakin, “Thawk khat lai kha chuan kan inbe ngai lo,” a ti a, mahse, nikum atang khan an inhriatthiam lohna te dahthain, an in-pafa leh thei ta a, a unaupa Braison Cyrus kum 31 tlin champha lawmnaah pawh a pa nen reunion-in, an chhungkaw thlalak a Instagram-ah a post a, a caption-ah “peace” tih leh “healing” tih te a dah tel bawk.
Miley chuan a arsi hawnnaah hian hnuk ulh teuh chunga lawmthu sawiin, “Ka chhungte, ka chhungte la ni turte, ka nu leh pa, ka nu, ka unaute, ka thiante, ka thawhpui zawng zawng te: Ka duhthlanna chauh ni lo, ka hlauhna te thlenga min hmachhawn pui thin avangin ka lawm e. Ka fan-te pawh, nitina min support-na leh min duhsakna te kha ka duhthusam ram min thlen tirtu a ni e,” a ti bawk.