Mim Kût hman dan…

Nimin khan Mim Kut hman a ni a. Chapchar Kut anga sawrkar chawlh puan a ni lova, social welfare department hmalaknaa huaihawt a ni a. GAD-in Kut pualin sawrkar pisa leh zirna inah te thawktute’n a remchan anga Mizo hnam thuam inbel theuh turin ruahmanna a siam a. Vanapa hall-a Mim Kut hmanna chu youtube lamah live-a pekchhuah a ni bawk a.
Mim Kut hi Kût dang anga hlimna lam hawi ni lovin, mitthi pual a nih avangin ‘tahna kut’ a ni ber a. Pi leh pute khan Vaimim châr seng zawh hun (Aug&Sept) velah an hmang thin a, mitthite ei tur pek (chhiah) thinna kût a ni.
Kristian kan lo nih tak hnu hian, pi leh puten Kût hrang hrang an lo hman dan kha a nihna anga chhunzawm rem tawh lo tam tak a awm a. Tun hma leh tun hnu a inan theih tawh loh chhan pawh sakhua a inthlak tak vang a ni tih kan hre tlang vek awm e. Chutih rualin hnam tihdan culture vawn that a pawimawh tho avangin, thangthar zel ten pi leh pu ten Kût an hman dan an hriat zui reng theih nan drama hmanga entir te a tul ta thin a, hei hi kalpui zel tur pawh niin a lang. A nihna takah chuan, pi leh puten thih hnu thlarau kalkawng an lo ngaihdan leh tun hnua thih hnu thlarau kalkawng chu inpersan tak a ni a, ‘thlai chhiah’ han tihte phei chu a taka hman rem tawh lo a ni.
Chutih rual erawh chuan, drama hmanga Kût tobul kan entir dan emaw, ziaka kan dah dan emaw hi inang tlanga kalpui dan ngaihtuah erawh a pawimawh dawn hle tih a lang. Mim Kut lo chhuah dan hi youtube lamah ziak a ni emaw, video a ni emaw, voice a ni emaw chhiar tur leh en tur, ngaihthlak tur a awm nual a. Tlingi leh Ngama chanchin atanga bul intan a nih danah a inang tlang a, mahse ‘thlai chhiah’ lo intan dan erawh a inang lo zung mai a ni.
Chuvangin, Mim Kut hman apianga kut lo chhuah dan entirna drama etc. a inanloh zung chuan, a lo rei zel ang a, nakinah chuan nui hluah hluah chungte hian Mim Kût hi hman zui a ni mai ang tih te pawh a hlauhawm hlel lo a ni.
Hetih lai hian, hnam tih dan Mim Kût hmang na na na, modern musical instrument nena rik bung bung hi a inhmeh lo deuh niin a lang a, hmanlai pi leh pute hun laia musical instrument ang kha a tam thei ang ber phochhuahna hunah te hmang zawk thin ta ila, chu chu naupang leh thalaite tan pawh a hlawkthlak hle awm e.