MINECO-ah plot pek tur awm tawh lo Aizawl-Silchar helicopter service dawn
MINECO-ah plot pek tur awm tawh lo
Aizawl-Silchar helicopter service dawn
Mizoram sawrkar Secretariat thar MINECO-ah building leh thildang dah belhna tur pek thar theih a awm tawh loa, sawrkarin pek a khap tawh hrim hrim bawk.
Chief minister Lalduhoma chuan a department chan zing ami General Administration Department (GAD) hnathawh thlirletin Ningani khan an hotute a thutkhawmpui a. GAD hnuaiah hian deputy commissioner 11, GAD (Main), GAD (Secretariat Administration Wing), GAD (Protocol & Hospitality), GAD (Aviation), Mizoram House pasarih, Mizoram Information Commission, State Election Commission, Sinlung Hills Council, Sialkal Range Development Council leh Chief Election Commission an awm a.
GAD enkawl peng hrang hrang hnathawh sawi zingah – MINECO ram hi sq.m. 6,42,676.04 a zau niin plot 90 a awm tawh a. Plot hi pek chhuah tur a awm tawh loa ngaih niin, kumin July atang khan plot thar pek chhuah khapna siam a ni.
Lengpui Airport runway thuamthatna atan sawrkarin tunhnaiah cheng vaibelchhe 86.8 a pe a. Hna thawh theih veleh (working season) chak taka thawk turin mamawh lam khawm mek a ni. Airport ram hungna tur cheng nuai 162.06, Terminal-a air condition bunna tur nuai 544.06 leh conveyor belt pahnih bunna tur nuai 375.84 pek tawh an ni.
Lengpui Airport an enkawl theih dan tur an rawtna Airport Authority of India atanga nghah mek a ni.
Mizoram helicopter service mek atangin kum khatah cheng vaibelchhe 33 vel hmuh thin a ni. State sawrkarin kum khatah vbch. 2.5 vel a seng ve thin. RCS UDAN hnuaiah kumin October atang hian Pawan Hans helicopter a service belh leh dawn a, a service-na tur zingah Aizawl- Silchar leh Aizawl- Churachanpur a tel.
GAD hi Service Review Committee hmalakna nei hmasa ber nia hriat an ni a. Sawrkar hnathawkte zirchiang a, thawk zui zel tlak lo emaw thawk zui thei tawh lo chu Special Pension Scheme hmanga pension pek tur an ni. An hmunruak hnawhkhahna tur hi rang taka kalpui dan dap a tul tih sawi a ni a, ‘single window clearance’ system hmanga heng mite pual bik recruitment hi kalpui a that rin a ni.
Thutkhawma sawi dang:
8 Thenzawlah cheng vbch. 12 sengin heliport sak tum a ni a. Ministry of DoNER-ah lehkha pawimawh thehluh vek tawh a ni.
8 District administration (deputy commissioner) ramri mila department dangte bial enkawl herrem a tul zia sawi a ni a, zirchian nise an ti.
8 District-a Independence Day/ Republic Day lawmna senso, district office hrang hrangin an thawhkhawm thin chu a tawp theihnan sawrkarin budget head siamin, sum dah ve tawh se tia rawt a ni.
8 Tunah GAD hian SASCI Fund hmangin project 11 an kalpui mek. MINECO-a Integrated Office sak; Lunglei, Lawngtlai, Siaha, Serchhip, Kawnpui & Bairabi-ah sawrkar quarters (General Pool) sak; Siaha, Serchhip & Saitual-a Circuit House sak mek an ni.
8 GAD-in leiba an ngah thin a, tunhnai kum hnih chhungin an leiba tam tham tak hi sawrkarin a rulhsak deuh vek avangin lawmthu an sawi. GAD hnuaiah hian officer 250 aia tam awmin thawktu 1000 chuang an awm.
8 Ainawn Vengah sawrkar quarters building 47 a awm a, chhungkaw 184 luah theih a ni. A luahtu zinga chhungkaw 45 chauhin dan anga sawrkar allotment an nei. Kum 2023-a Council of Minister-in quarters hi thiah vek tur, tia a lo rel tawh angin tuna luah mek hi a zone ang zelin an chhuah hun bituk sak an ni. A chhuak hnuhnung ber turte chhuah hun chu January 2026 a ni. Quarters hi a thar sak a ni ang.