MINECO chhehvela hnim tihfaina atan hlo tur hmangtu hrem an phut

New Capital Complex /MINECO chhehvela hnim tihfaina atan hlo tur (pesticides) nasa taka hman chu luite zawk atangin Aizawl tui tlan Tlawng luiah a luanglut mek tih Centre for Environment & Social Justice chuan sawiin, hlo tur hman tura thu petu hi hrem a, environment a tihchhiat compensate-na atan cheng nuai 50 chawi tir an phut.
CESJ hian Thawhtanni khan Mizoram Pollution Control Board chairman hnenah lehkha an thehlut a. MINECO chhung kawngkam hnim, hlo tura kah a ni a. Hlo tur hi a hman dan tur (proportion leh dose) dik taka hman a nih loh chuan kan environment-in a tuar tih a sawi.
‘Tun ang fur ruahtui tlak hun laia New Capital Complex chhung kawngkam hmun tam taka hnim kahna hlo tur hman a nih hian, ruahtuiin hlo tur chu a thlang Tuikual lui leh Lamhla luiah a luanluh pui a, chu chu Aizawl khawpui tui tlan, Tlawng luiah a luh avangin Aizawl mipui tui tlan leh nungchate chenna Tlawng luiah tur (poison) ti lutin an tibawlhhlawh tihna a ni,’ a ti.
Hlo tur thawh nat zia leh hnimin a huat zia chu chiang takin a hmuh theih tih CESJ hian sawiin, sawrkar hmun pawimawha kawngkam hnim tihfainana hlo tur hmangtute chu a rang thei ang bera zawng chhuak a, dan hmanga hrem an nih theihnan hma la turin MPCB an ngen tih a sawi a. Tur hmangtuten environment an tihchhiat compensate-na atan Rs. 50,00,000 chawitir turin an ngen tih a sawi bawk.