Minister chunga AR chet dan hi politic thil ni lo hnam thilah kan la – Leader of Opposition

Minister chunga AR chet dan hi politic thil ni lo hnam thilah kan la
– Leader of Opposition
Power minister chunga Assam Rifles chet dan chu politic thilah an la loa, hnam thilah an la a, sawrkar a che thuaina chi a ni tih leader of opposition Lalchhandama Ralte chuan a sawi.
Thawhtannia Mizo Hnam Runa inkhawmah MNF vice president Lalchhandama Ralte chuan, October 17-a Power minister leh Assam Rifles indan buai chungchangah MNF Legislature Party chuan buaina thlen tuk, October 18 khan thuchhuah siamin AR chet dan an dem thu an sawi a. Congress leh BJP pawhin an dem thu an sawi tih a sawi.
“Democracy kan ni a, lndia ramah hian mipui thlantlin an lal ber. 2 Assam Rifles-in minister an dang buai hi Armed Forces (Special Powers) Act 1958 hmanna ang maiin an duhna hmun hmuna check post an siam hi kan dem a. Hei hi MNF Legislature Party chuan kan dem tih kan sawi nawn a ni. AR hi border-a duty tur an ni a, Zoram hmun lailiah check post siama an duty hi kan dem a. Ngopa daia feh tur an dapte hi kan dem a. An chet dan hi a thinrim thlak a, sawrkar pawh hi a in ennawn a ngai a ni,” a ti.
Minister 12 zinga pakhatin harsatna a tawh laia chief minister leh home minister an ngawi rei lutuk chu hlauh an ngah ta viau nge an ngeng a chhun lo, tia Lalchhandama Ralte hian zawhna zawtin, CM-in a tih tur nia a hriat chu, AR hotu lu ber a rang a rang koh bakah Union Home ministry-ah thlenin action la turin hma a la nghal tur nia an ngaih thu a sawi.
“Ram leh hnamin chhantu a ngai a. Kha thil thleng kha hnam issue dik tak a ni. Power minister tawrhna hi kan tawrhpui em em laiin, ZPM sawrkar leh an party an ngawi tlat hian ngaihtuah loh tur thil tam tak min ngaihtuah tir phah. He thil thleng hi party dangte hian politics thilah an la loa, democracy leh mipui dikna chanvo tundin ni rawh se, kan ti mai a ni,” MNF hruaitu hian a ti.