Indian Oil Corporation Ltd in eirawngbawlna gas bur thar (composite cylinder) a siam chu Ningani khan IOCL chief general manager (LPG) DP Vidyarthy chuan chief minister Lalduhoma hnenah a hlan a, tun tum ami hi cabinet minister ho hman tur bik niin, a hma in chief minister leh Supply minister hman tur an lo hlan tawh a ni.
Chief minister hian hun engemawchen hman loha awm tawh Mualkhang Gas Bottling Plant siamtharna tur leh oil depot thar siamna atana hma an laknaah IOCL hotu hi lawmthu a lo hrilh a. Oil depot phei chu Mizoram mipuiin kan nghakhlel tawh a, chak taka hma la tura chahin, puih an ngaihna apianga pui turin state sawrkar a inpeih reng tih a hrilh a ni.
IOCL hotu DP Vidyarthy hian Mualkhanga Bottling Plant chu nitin bur 6000 chuang thun theihna tura an thuamthat tur thu a sawi a. Chu chu Mizoram nitin mamawh zat aiin a tam zawk tih a sawi. Oil depot siamna tur hi hmun li ah an thlithlai mek a, hun reiloteah duh an thlang dawn tih sawiin, a hmun a fel chuan hma pawh an la nghal mai dawn tih a sawi a ni.
Gas composite cylinder hi a zang zawk a, a himin enkawl a awlsam a, a puak thei lo (explosion proof) tih a sawi a. Mipuiin an Indane distributor-ah theuh ngaihven se an duh a, company lam chu an inpeih tawh tiin a sawi. Gas sem dan kalphung felfai leh mipui tana awlsam zawk tur an buaipui mek tih chief minister hi an hrilh bawk.
-- Advertisement --
u Indane composite cylinder hi IndianOil-in LPG-a a thilsiam thar ber a ni a, kum hnih kalta khan a lo buatsaih tawh.
v A cylinder hi thuah thuma siam a ni a. High density polyethylene (HDPE) hmanga a chhunglam hi tuam a ni. Chumi thuahtu atan chuan polymer-wrapped fiberglass hman a ni a; a pawnlang berah HDPE tho hman leh a ni.
w He design thar hian a hmaa LPG cylinder, thira siamte lakah nasa takin hmasawnna a nei a. Cylinder thar hi a hmaa cylinder-te rih zawng chanve vel chauh niin, kenkual a awlsam sawt dawn.
x Ni thlara ena langtlang thei a nih avangin LPG level a enfiah mai theih dawn a. Tuiek a awm ve theih tawh dawn loh avangin a hmaa gas bur puta harsatna awm thei tamtak kha a awm dawn lo. A pian hi chokaa awlsam taka dah rem mai theih tura nia ngaiha siam a ni.
y Heng zawng zawng bakah hian heng cylinder thar hi a puak ve thei lo a, a him zawk em em a ni