Minister-in Forester Convocation hmanpui

Minister-in Forester Convocation hmanpui
Environment Forest & Climate Change Minister Lalthansanga chuan Forester training batch 24-na Convocation programme chu Forester Training School Conference Hall, Bethlehem Vengthlangah khuallian niin nimin khan a hmanpui a, Principal Chief Conservator of Forests Rajeev Kumar Tiwari chu khualzahawm a ni.
Minister Lalthansanga chuan Forester training zote lawmpuina thu sawiin an training chhunga an thil zir zawng zawngte hre renga, an hnathawhna-a tangkai taka hmang zui turin a chah a. Mipui hma-ah chuan Field Staff-te hi Forest Department hmel siamtute an nih avangin khawtlang leh pawl hrang hrangte tha taka thawhpui turin a chah a. Forest Department leh mipuite karah thawhhona tha a awm theih nan ramngaw, thing leh mau, nungchate venhimna leh humhalh kawngah zau zawka mipuite thleng phak inhrilhhriatna chi hrang hrang huaihawt a pawimawh thu a sawi a. Ram leh hnam tan an tha leh zung piah lamah an thiamna leh theihna kawngah theihtawp chhual zel turin trainee-te chu duhsakna a hlan a ni.
PCCF Rajeev Kumar Tiwari pawhin he hunah hian thu sawiin Forester Training School-a hotuten taima tak leh phur taka trainee-te zirtirna an pe chu lawmawm a tih thu a sawi a. An training chhunga an thil zir zawng zawngte vawng renga, an hnathawhna-ah mipuite nen thawhhona tha tak nei turin trainee-te chu a chah a ni.
Forest Training School hi November, 1974-a din niin, Forester 336 leh Forest Guard 643-in he school atang hian training chhuak tawh a. Forester batch 24 na-ah hian trainee 12 awmin, honors-in an pass vek a, an training chhung hian Mizoram chhung leh Mizoram pawna National Park leh Forest Division hrang hrangte tlawhin study tour an nei a ni.