Minister-in kawng siam a en

Leitan leh Sihphir inkar kawngpui siam that hna thawh mek chu Nilaini khan PWD minister Vanlalhlana’n a hmunah a endik a, Durtlang khawtlang hruaitute nen an inkawm bawk.
Minister chuan sawrkarin kawngpui siamna tura sum a pek chu a nih dan tur ang taka hman a nih avangin sawrkar sum daihzai zawkin hman a ni tih a sawi a. Kawngpui chu kan ram hmel lanna a ni, tiin, kawng siam meka Joint Action Committee-in vilpui tura mawhphurhna a lak chu fakin khawtlangin kawng tha a duh a tilang tih a sawi a ni.
Minister tawiawmtu PWD hotute chuan Zuangtui leh Selesih inkar siamthat hna chu he kawngpui thawh zawh ruala thawh tan ve nghal a ni dawn tih an sawi a. Khawtlang hruaitute pawhin kawng siam danah an lungawi thu sawiin, khawtlang mamawh hrang hrang an thlen a ni.
Leitan to Sihphir kawng siam hi Central Road and Infrastructure Fund hmangin SLT Infracon Pvt Ltd-in a thawk a, hun reilotea zawh beisei a ni.