Minister-in RTI an enpui a ngai?

A dan lamah chuan RTI chhanna hi minister-in an enpui a ngai lo a, Mizoramah chuan a ngai a nih hmel! Tun hnaiah minister-in an enpui avanga tlai an awm.
A danah chuan Right to Information (RTI) hmanga zawhnate lo chhang turin sorkar department tinin State Public Information Officer (SPIO) an nei ang a, SPIO hian an lo chhang thin ang. Tun hnaiah erawh SPIO chhanna tur hian minister dawhkan a thleng a, minister-in a lo en.
Department zawng zawngah chutianga tih chu a ni em tih te, minister-te’n mahni department theuh an lo enpui dawn em tih te chu hriat a ni lo.
Miin RTI hmanga thil a zawhin, ni 30 chhunga chhan hman tur a ni a, tun hnaia RTI hmanga department pakhata thil zawttu pakhat chu minister-in a en avangin ni 30 hnuah an chhang chauh!
RTI hmanga zawttu hian ni 30 hnuah chhanna a dawn thu a sawi a, hei hi department-in an chhanna tur chu minister hnenah thawnin, ani’n a lo en ve phawt avanga chhanna hi dawng har a nih thu a sawi.
RTI hmanga thil zawttu mi dang pakhat pawhin a zawhna chhanna hi kar khat velin a dawn tlai thu leh, hei hi minister vang a nih thu a sawi.
A sawi danin, a zawhna chhanna peih a nih thu leh lam theih a nih tawh thu department atanga hriattir a ni a, a lamtu tur an kal chhungin department lam chuan minister-in a en phawt dawn tih an hriattir leh thu a sawi. Minister-in a en chhung hian ni 30 a liam hman a, kar khat velin an tlai ta tih a sawi bawk.
Session liam taah khan house leader-in RTI aiin House-a an sawi a rintlak tiin a lo sawi tawh a, RTI chhanna hi minister te’n an enpui hman lo tiin a lo sawi tawh.