Minister leh HoO inkawm

Champhaia kal Home minister K Sapdanga chuan Ningani khan district head of office-te a kawm bakah Champhai Superintendent of Police pisa tlawhin, District Executive Force (DEF) hotute nen an inkawm.
Head of office-te chu Mizoram run mektu ruihhlo do kawngah theihtawp chhuah pui turin a ngen a. Ruihhlo chu thil kalphung ve reng tur a ni, tia ngaih liam mai aiin, kan awmna theuh – pisa, kohhran leh khawtlang atanga kan do tlan a ngai tih a sawi.
DP&AR minister hian HoO-te chu sawrkar hna hi eizawnna atan chauh ni lo, vantlang rawngbawlnaa ngai turin a chah a. A hautak lo zawng, a thawk chhuak tam zawnga hna thawh tum theuh tur a ngen.
Inkawmho hi Champhai bawrhsap VL Remliana chuan a kaihruai a. Champhai district-a sawrkar pisa hotute chuan department hnathawh, hmachhawp, hmalakna leh mamawh an sawi a ni.
SP office a tlawhnaah K Sapdanga chuan Mizoram sawrkarin ruihhlo leh kuhva tawlh ruk dona kawngah theihtawp a chhuah tih a sawi a. Kumin August thleng khan ruihhlo cheng vaibelchhe 160 hu man a ni tawh a, a kaihhnawihah mi 355 man an ni tawh tih a sawi. Sawrkarin ruihhlo leh dan phal loh thil dang a dona kawngah Mizoram Police hnathawh a chhuan thu sawiin sawrkar innghahna an nih angin police-te chu thawkrim zel turin a fuih.
Champhai addl SP Lalmalsawma Hnamte report danin, Champhai district-ah hian police station pathum – Champhai, Zokhawthar leh Dungtlang PS a awm a, Hnahlan leh Farkawnah beat post a awm bawk. DEF bakah hian Assam Rifles (2 leh 42 Battalion) chu hmun sarihah inkhuarin venhimna an kalpui a ni.
UD&PA minister ni bawk K Sapdanga hian CDFA Playground – Chhangphut Field a tlawh nghal a. Champhai District Football Association hruaitute nen SASCI sum vaibelchhe 4.45 hmanga floodlight bun mek chu an enfiah a ni.