Minister pahnihin Dungtlang-ah Lungphun hawng
Art & Culture Minister C.Lalsawivunga leh Health Minister Lalrinpuii te chuan nimin khan khan Dungtlang khuaah Pipu Sulhnu Humhalhtu Pawl Organising Committee buatsaih Thangchhuah Lungphun, Lianchhiari Lungphun leh Pasaltha Lalhmingliana Lungphun hawnna hun an hmang.
Thangchhuah lung hi Lalduhoma, Zoramthanga, Lalrinpuii, B.Sangkhumi, David Zohmangaiha leh Jeremy Lalrinnunga te hminga phun a ni.
Art & Culture Minister C. Lalsawivunga chuan pi leh pute zahna chibai bukna thu sawiin, Pasaltha Lalhmingliana hmingin kalkhawmte chibai a buk a. Pasaltha Lalhmingliana chuan Tumpang sial chu muzuk feiin a chhun hlum a, nau awih hlaah “Tumpang siali a vawr e Lalhmingliana’n” tih lo chhuah chhan a nih thu a tarlang a ni.
Art & Culture Minister hian tunhnai khan Dungtlang Sangsarih khua pipu hmun hlui atanga ruhro laihchhuahte chu engtik hun ami nge an nih tih hriat nan Carbon dating tih a ni a, a result atang chuan heng ruhrote hi kum 1740-1780 AD hun lai ami ni a hriat a ni a, DNA pawh tih leh tura hmalak mek a ni bawk tih a tarlang a. Khualzin mite tana hmun hlu zawk a nih zel theih nan Dungtlang khaw chhehvel chei that chu sawrkar pawhin a ngaipawimawh zel a ni, a ti.
Health Minister Lalrinpuii chuan Dungtlang leh a chhehvel khua te chu sawrkar hmalaknate ngaihvena a chhawr tangkai bertu ni turin a sawm a. Khualzin mite hip kawngah khawchhak tlangdung khua ten hma la zel se a duh thu sawiin, pipu sulhnu leh hmun hlui te humhalh zel turin a chah a ni.
Pipu Sulhnu Humhalhtu Pawl Organising Committee hian kum 1997 khan mi 52 te thangchhuah lung an lo phun tawh a, nimina mi parukte nen helai hmuna thangchhuah lungphunte hi mi 58 an tling tawh a ni. Organising Committe lam chuan Mizo hnam tana mi hming thate tan he Thangchhuah lung hi phun zel an tum thu an sawi a ni.
Minister pahnihin Dungtlang-ah Lungphun hawng
Get real time updates directly on you device, subscribe now.