Minister rank inruatnaah Dan hmanga endik turin ti

Mizoram sawrkara minister rank inruat danah India danpui kalhna a awm leh awm loh enfiaha a tul anga hma la turin larsap chuan sawrkar a hriattir.
PC party chuan kumin July 9 khan larsap hnenah hian lehkha thehlutin, ZPM kaihhruai sawrkarah minister leh an tlukpui inruat theih zat aia tam an inruat mek tih an thlen a. Hei hian India Constitution Article 164(1A) bawhchhiatna nia a lan avangin hma laksak turin an ngen a ni.
Larsap hian July 18 khan he lehkha bawhzui hian chief secretary hnenah danpui bawhchhiatna a awm leh awm loh en a, dan bawhchhiat a nih chuan a tul anga hma la turin a hriattir a ni.
PC president Vanlalruata chuan India Constitution Article 164(1A) in Mizoram tan minister 12 aia tam neih a phal loh lai a, portfolio nei hrang leh office nei thlapa adviser to chief minister 5 ruat an ni chu Constitution kalhah an ngai tih a lo sawi tawh a. Larsap hnenah bak hian ZPM Val Upa Council hnenah hemi chungchang hi an thlen a ni.
ZPM VUC hi chuan thu leh hla an la rawn nei lo niin PC president hian a sawi.