Minnesota state senator thattu um zui mek

Minnesota state senator thattu um zui mek
Minnesota, US-a House of Representatives pahnih beia pakhat thahna thlengah a titu zawn hna thawh mek a ni a. Inrinni tuka thil thleng hi Governor Tim Walz-a chuan ‘politics-a tum bik neia tharum thawhna’ tiin a sawi.
Kum 55 mi, Democrat Melissa Hortman-i leh a pasal hi Minneapolis khawpuia Brooklyn Park bulah thah an ni.
Kum 60 mi, Democrat tho, John Hoffman leh a nupui pawh he thil thlenna atanga km 15 vela hlaah kah an ni a. Zai ngai a ni lo hlauh va, a dinhmun pawh a tha.
Police chuan a titu nia an hruai hi officer anga awm niin an sawi a. Kum 57 mi, Vance Luther Boelter-a niin a chin hrilh thei hnenah $50,000 pek an tiam.
State Senator Hoffman-a nen hian an state-a workforce development board-ah an thawkho thin a; mahse, mi malin an inhria em tih erawh an la chhui mek.
Police chuan a mi beihte inah hian badge leh uniform lem hmanga lutin police lirthei ni awm tak, emergency light pawh invuah nen a lut niin an sawi.
Kohhran an dawn hmasak ber chu Inrinni zing dar 02:00 (India-a chawhnu lam)-ah dawngin Hoffman leh a nupui kah an nih thu an hria a. Tlai dar 03:35-ah kohna dang dawng lehin House Speaker Hortman-i in lamah a ni thung.
Hortman-i inah hian police nen pawh an inkap a; mahse, a tlanchhe zui thei.
Brooklyn Park Police Chief Mark Bruley chuan police hian FBI, SWAT leh police officer za rualin a zawn hna an thawk mek tih a sawi a. A car chu an hmu a, kea a kal an ring.
Thuneitute chuan mi chengte chu an kawngka kiktu chu police officer pahnih tal an nih loh chuan hawng lo turin an ti.
Dan thiam, Hortman-i hi kum 2004 khan Minnesota House of Representatives-a thu tura thlan tlin a ni a, kum 2019 leh 2025 inkar hian House Speaker a ni.
Fa pahnih a nei a, a pasal, Mark pawh hi a ruala thah a ni.