Mipain eng nge a duh tak tak ni ang le?

Mipa ten, “Hmeichhia rilru hi eng nge ni ang aw?” an tih nauh nauh laiin, chutiang chiah chuan hmeichhia te pawhin an lo ngaihtuah ve tho mai. Mipa zawng zawng an inang vek lo, mahse, thil thenkhatah erawh a nawlpuia laka inanna an nei a, thenkhat chu kan rawn tarlang e.
Mipa thenkhat chuan an rilru a an vei zawng te chu sawitlang nghal pawp lovin, an pehhel kual thin. Chutiang hunah chuan hmeichhiain mipain a rilru te a phawrh theih nan zawhna pek thiam a ngai thin a ni.
Mipa thenkhat chuan an rilru put hmang te chetziain an lantir thin. Chuvangin a chetvel dan kha chik chhin teh, inchhung sekrek khawihah te, “Min lo pui teh” i tih kher loh pawhin a lo che ve thin em? Chutianga i thil tih tur ama tawka a lo tihpui che chuan a duat ve dan che a lantirna emaw a ni thei.
Hmeichhia ten mipain an thusawi an ngaithla tha peih lo, tiin an phun thin. Mahse, chutiang a ni vek kher lo. “Ni e,”, “Aw”, “A tha a lawm,” tih vel a i thil sawi karlaka a lo phun ve sup sup kher lo a nih pawhin thinrim phah lem suh. Mipa thenkhat chuan ngawi rengin i thusawi kha uluk takin an lo ngaithla reng tho a nia.
Hmeichhia-in an zar deuh cheng cheng reng hian mipa chuan an ning thuai mai thin. In pahnihin hun hlimawm tak in hmang duh thin a ni mai thei, chutiang bawkin mipa chuan ama duh zawng tih theihna hun pawh a mamawh a nia. Thlah zalen deuh thiam a tha.
Mipa hi i chetziain i rilru puthmang hriattir tum suh, an hrethiam tak tak ngai lo. Hre tura i duh chu hrilh tlang tawp mai rawh.
Hmeichhia zawkin an chhai deuh khat khat hian mipain nuam an ti ve tlat. A chet la hmasa zawka hmeichhia an tan te hian mipain nuam an ti riau.