Mipui aiawhtute…

Vawiinah Mizoram chief minister leh council of ministers lakluh a ni ang a, karleh Thawhtanni December ni 12 hian sawrkar thar hnuaiah Mizoram Legislative Assembly pakuana session hmasa ber chu neih a ni dawn ta a; Assembly House chhung boruak thar hmuh chakin Mizoram mipuiin ring kan fan mek e.
House chhunga lut pha chin legislator-te hi House chhunga lut thei tura thlan tlin an nih hma kha chuan mipui zinga mi pakhat, han zahawm fal bik em em (mimal zahawmna an nei lo tihna ni lovin) an ni hran awm lo e. Mipuiin House chhunga lut thei tura an thlan tlin chinah erawh, mi pangngai an ni tawh lo va, anmahniah mipui an beh tel tlat tawh avangin legislator-te hian zahawmna leh thuneihna an chhawm nghal a, chu chu anmahni inpek ni lovin mipuiin an pek a ni. Tunhmaa ‘ka pu’ tih an dawn leh, legislator an nih hnua ‘ka pu’ tih an dawn chu inthlau tak a ni tawh a, a chhan pawh mipui ai awhtu an ni tawh a, an thiltih, an tawngkam engkim mai kha mipui aiawha ti an ni zel tawh a, thuneihna pawh mipui pek a ni a, zahawmna pawh mipui pek a ni a, chuvanga thunei leh zahawm chu an ni.
He nihna hi dik lo taka hman a nih chuan ram leh hnamin a tuar thin. India ramah pawh hian hetianga thuneihna hman sual avanga tawrhna hi a tam ta khawp mai.
Hun kal tawha House chhung boruak kha a hretute chu mipuite kan ni. Mipui aiawha roreltute zingah, mipui aiawhtu an nih mangnghilh thak niawm taka tawngkam tuitang vak lo cheh thin, Speaker pawhina a khap ngai hial an awm thin a. A chang chuan, khawi lai community hall emawa function hmang ni awm leka fiamthu thawha nuih dur dur changte a awm. Rorelna in chhung vawn zahawm kawngah tanlakna tur a awm nual awm e.
Kalphung thar sawrkar hnuaiah House chhung boruak thar engnge kan hmuh dawn tih chu mipui hmuh chak a ni a. House member-te pawh mipuite hre rengin an zahawmna leh thuneihna vawng him tlat turin inbuatsaih sauh sauh se a duhawm hle a ni.