Mipui himna…

August ni 19 chhunah, Maubawk Veng Aizawlah, kum 80 mi, ama chenna in chhung ngeiah, rawng taka thah a ni a. He thil thleng rapthlak tak hian tu te pawh a thawng vek awm e. Vanduaina tawkte an lainatawm a; he thil thlen dan hi a thinrimthlak hle a ni. Hetianga rawng taka kum upa tawh tak, mahni pawha insaseng hlei thei tawh lo tur, thi khawp hiala kutthlak duh ‘mihring’ an awm ta mai hian, khawtlang/mipui himna tura inbuatsaih thar leh a tulzia a lantir chiang hle a ni.
Maubawk Vengah hian kan hnung lawk khan, Vawk pakhat chu rawng taka tihhlum a lo ni tawh bawk. Kha kha ruihhlo ngai (drug addict) te thiltih nia rin a nih thu sawi thawm te pawh a awm nghe nghe.
State ralmuang bera inchhal mek hi, a ralmuang ta lo hle mai. Police lam report atanga lo lang thin chu, pawikhawihna thleng thin zingah rukrukna hi a hluar pawl niin a lang a. Rukrukna a hluar chhan hi zirchian ni ta se, ruihhlo nen hian a inkungkaih thuk hlein a rinawm. Ruihhlo ngaite hian an duhzawng an neih theihna tur a nih chuan ‘pawisak an nei tawh lo’ thin; tum lawk ren run lo pawhin, remchang a awm phawt chuan, rilru harhfim pu lo ta chuan eng pawh mai hi an ti duh thin ni maiin a lang.
Ruihhlo kaihhnawih kher lovah pawh, khawlaia thil zuar phu suau suau thin (Dawr-ak an tih maite) hi khauh lehzuala khuahkhirh a tul ta hle niin a lang bawk. Mi kawmkarah te kalin, an duh duh kawngka an kik a, mi kawngkhar an pawt hawng pawp pawp ngam a, hei hi a him lo em em a ni. A him loh bakah, hetia sumdawnna thil an kalpui hi, awmhmun ngheta dawrkai, rinawm taka sawrkara chhiah chhunglut thinte tan pawh a tha lo hrim hrim.
Hemi chungchangah hian, khawtual sawrkar (local council) leh pawl hrang hrangten, khawtlang himna tura hmalak a, kan tanrual a ngai takzet ta.
Veng tin hian CCTV hman tangkaina lamah bung thar kan kai a pawimawh bawk; chu chu kan hun tawn mek hian a phut tlat tawh a nih hi.