Mipui hmakhua ngai lo ila health care ti awlsam thei – Health minister

Mipui hmakhua ngai lo ila
health care ti awlsam thei
– Health minister
Mipui hmakhua ngai lem lo nise, a awlsam zawng ngaihtuahin health care scheme-ah reimbursement an kalpui thei reng tih Health minister Lalrinpuii chuan a sawi.
Mizoram Health Care Society buatsaihin Mizoram Universal Health Care Scheme kalpui tawh dan thlirletin an thukhawm a. Health & Family Welfare minister hian mipui sawrkarin a kalpui mek ‘Mipui Health care’ chuan hma a sawn zel nia sawiin, mipui hmangaih vanga mipui health care chu duan a ni tih a sawi.
“Mipui hmakhua ngai em em loin, a awlsam zawng ngaihtuah ni ila, reimbursement kan kalpui thei reng a. Mahse, mipui hmakhua kan ngaih avangin cashless kalpui a ni. Mipui sawrkar, mipui ta, mipui tana ding sawrkarin mipui tana health care system hi a duan a nih tlat avangin a hlawhtlin chhoh zel ka beisei,” a ti.
Theihtawpin sawrkar damdawi in an thuamtha zel a, thawktu pawh a lak belh mek tih a sawi bawk.
Thutkhawmah hian community health centre leh primary health centre-a thawkten MUHCS an kalpui dana hma an lakna leh harsatna tawh an sawi ho a ni.