Mipui inchhir kum a ni mek – MNF treasurer

Mipui inchhir kum a ni mek
– MNF treasurer
Sawrkar mekten beisei an phak loh avangin mipui inchhir kum kan tawng mek tih MNF hruaitu Lalruatkima chuan a sawi.
Thawhtannia MNF office-a inkhawmah MNF treasurer hian kalphung thar chu inbumna leh intihderna a ni zo ta tih sawiin, campaign laia an thusawi loh ang hlirin ram an kaihhruai a, mipui an beidawng a, a changin nuih a za a, a changin thin a rim tih a sawi.
Kumpuan anga neih tur nise, kum 2024 atanga 2027 chu ‘enchhin’ aiah ‘inchhir kum’ a puan vek a, kum 2028 chu inchhir avanga inlamlet kuma puan hial chi a nih thu a sawi bawk.
“Sinlung Hills Council inthlanah mipui ngaihzawn an ni loa, hlawhtlinna an chang zo lo. Kalphung thar sawrkara kan beiseina zawng zawng chu thuneihna duh luat vanga vote zawnna mai a lo ni tih mipuiin kan hmu chho mek a, inbumna leh intihdernaah mipuiin kan ngai zo ta a. An campaign auhla ‘enchhin’ tih chu inchhir’ ah a chang zo ta,” Lalruatkima hian a ti.
Tunhnaiah Manipur-a Zofa unauten harsatna nasa zawk an tuar a, MNF sawrkar laia an thlamuan ang khan ZPM sawrkarah an thlamuang meuh em, tiin MNF hruaitu hain a zawt. Inthlan dawna an inhrosak anga awm loin, unaute thlavang hauhna kawngah sawrkar chu Thereng vuak thlak angin an reh vang vang tih a sawi a ni.
MNF sawrkar laiin Zofate insuihkhawm lama hma la in Kutpui hial buatsaih a nih thu te, kum 2021-ah Vairengte daia Assam Police-in ram an rawn lak chu huaisen taka hmachhawnin an hum a, luah chhunzawm zel a la nih thu te, Bru raltlan vote neihna chinfel a nih tak thu te, Mizoram -Assam- Cachar ramri chingfel turin Mizoram Boundary Commiteee dina hma lak chhoh a nih thu te a sawi bawk.