Mipui mawhphurhna leh pawimawhna

Supply department-in buhfai a lakkhawm leh supply centre hrang hranga mipui ei tur a sem chhuah tur phurtuten kawng lakah an hralh thin tih finfiah a ni a. Hetianga dik lo taka thil titute lakah hian FIR thehluh a ni a. FCS&CA department chuan thil dik lo titute do let turin tanrualpuiah mipui a sawm nghal bawk a.
Eirawngbawlna gas tihchingpen kan buaipui a, tun thlengin a la reh hleithei lova, chutih laiin buhfai phurtuten kawnglakah an buhfai phurh an lo hralh ru thin tih manchhuah a ni leh a. Buhfai semtu Retailer atangin buk dik lo pekchhuah thin a nih avangin buhfai sem dan system siksawi kual mek a ni bawk a. Market lamah ni se, bukna dik lo kan buaipui reng a. Thingzai ni se, tehkhawng anga tling tha a awm tawh lova, lung ni se, chuti bawk.
Heng thil dik lo a awm chhan leh dik lo taka thil ti duhten an tih theih chhan chu, ‘Mipuite’ hi kan ni ta ber awm e.
Eirawngbawlna gas tihchingpen chungchangah kan hahin kan buai rei ta hle. Awlsam taka chinfel dan a awm a, mahse chu chu kan ti duh tlat lo. Gas lak dawnin buk zel ila, a bul lam atanga dik lo awm thin hi a reh mai tur a ni a.
Chutiang bawkin, relaiter atangin buhfai kan la a, a buk a tlin leh tlin loh chungchangah mipuiin a dik lo do ngam ila, a buktuten an buk dik mai ang. Retailer-te pawhin buhfai buk dik lo dawng duh lo se, kudam atanga buk dik tak lak tum se. Chutiang bawkin buhfai lo kalna kawnga a mawhphurtute an inthli fim chho zel mai ang.
Chuti a nih chuan, mipui kan va pawimawh ta si ve. Mipui hian dik leh dik lo kan pawm leh pawm loh dan azirin thil hi a lo kal mai a nih hmel ta hle. Chuti a nih chuan mipui kan tanrual thiam a pawimawh ta a nih chu.
Supply department pawhin thil dik lo titute do let turin tanrualpuiah mipui a sawm a, he sawmna hi mipui hian i ngai pawimawh ang u hmiang maw le; chu chu kan mawhphurhna a ni a, chu kan mawhphurhna chu kan hlenchhuah that phawt chuan, thil hi a dik thluam tawh mai dawn tihna a ni.