Mipui min beisei anga tha taka thawh kan tum – Lalduhoma

Mipuiin beiseina sang tak nen an thlir a, an beisei ang ngeia tha taka thawh an tum tih chief minister Lalduhoma chuan a sawi.
Patron member a nihna Tualpui Welfare Aizawl chuan Inrinni khan Lalduhoma hi chief minister a nih chawimawina an hmang a. Heta thu a sawinaah politics a luh atanga tun dinhmun a thlen theihna tura amah thlawp tlattute an ni tih a hrilh.
Sawrkarna an siam atanga hun reilote chhung pawhin Pathian awmpuina an dawng nasa a, hna tha takin an la thawk zel a, sawrkar hnathawk hlawh leh health care bill tang engemawzat an pe nghal bawk tih a sawi.
“Mipuiin beiseina sang tak nen min thlir a, min beisei ang ngei hian tha taka thawh pawh kan tum a ni. Pathian zara kan dam chuan kumtharah central hruaitute nen Mizoram mamawh sawi ho tura inbuatsaih ka tum a, hmabak kan ngah hle,” a ti.
Mizoram larsap pawhin a phurpuiin theihtawp a chhuahpui tur thu a hrilh tih chief minister hian sawiin, “Hmabak eng takin min hmuak niin kan hria a, kan lawm hle. Heng kan hmabaka tih tur tam tak kan neihah hian ram mipui min tawiawm tur leh min tawngtaipui tlat turin ka ngen a ni,” a ti.