Mipui nawlpui kuta sum a luh a ngai – Lalnunmawia Chuaungo

Mipui nawlpui kuta sum a luh a ngai
– Lalnunmawia Chuaungo
Mipui nawlpui kuta sum a luh a, mahni kea ding thei kan tam hunah ramin hma a sawn lehzual dawn tih Congress hruaitu Lalnunmawia Chuaungo chuan a sawi a. Congress a sawrkar chuan NLUP changtlung zawk an sem leh dawn tih a sawi.
Inrinni khan Aizawl North I bial, Durtlangah Congress party worker intuaitharna hun hman a ni a. Hmanpuitu MPCC senior vice president Lalnunmawia Chuaungo chuan, sawrkar kan neih tawhah Congress party a rintlak ber, tin, tuna sawrkar mek chu intiam theihna zawng zawngah an intiam emaw tih tur khawp an ni a. Mipui hnenah nasa taka an intiam avanga anmahni ring em em lo te pawhin an intiam nasat avangin, “enchhin ve ila” tiin thlang tih a sawi. Mah se, kum khat awrh an sawrkarah hian mipui leh opposition party thlengin beisei an pha lo a; research base niloin, a tlachawpin, arkhawthim daiin an kal a ni ber tih a sawi.
“Mipui nawlpui kuta sum a luh a, mahni kea ding thei an tam hunah ramin hma a sawn lehzual ang. Chumi tur chuan chhungkaw nuai 1.4 aia tam mah hnena NLUP cheng nuai khat sem thei, mahni thutiama ding thin Congress party kan sawrkar chuan NLUP changtlung zawk kan sem leh dawn a, a tih dan tur kan ruahman mek a ni,” a ti.
Thusawitu dang, MPCC hruaitu Zodintluanga chuan, tuna opposition an nih chu Pathian remruat niin a sawi a. Congress thil tih that chu mipui hmaa puanzar a duh vangin Pathianin a dahsawn tih a sawi. “MNF term khat lek an sawrkar leh tuna kum khat lek sawrkar mipuiin kan rin loh hma zia en hian, Pathian hian a programme a rawn lantir tan a, Congress sawrkar rintlak zia a lang tual tual a, ZPM hi sawhthing vangin an tla leh dawn,” a ti.