Mipui sawrkar niloin BJP kal dan entawn kan hrawn – MPCC Media chairman

Mipui sawrkar niloin BJP kal dan entawn kan hrawn
– MPCC Media chairman
Mizoramah mipui sawrkar niloin, BJP sawrkar kal dan entawn sawrkar kan hrawn mek tih Congress party chuan an sawi a. ZPM an chak emaw chak lo emaw mipui thlante chu thawhpui thei tur an ni a, chu chu democracy kalphung pawh a ni tih an sawi.
MPCC Media deparment chairman Lalremruata Renthlei chuan, tunhnaiah Agriculture minister thusawi lai video a darh a, chutah chuan ‘opposition VC an thlantlin chuan, a ni chu an bialtu MLA a nih avangin an hmu ngam maithei a, a minister puite chu an hmu ngam dawn em ni, tiin a zawt tih a sawi a. Hengte hian neutral-te rilru a ti na a, mipui sawrkar an beseina a bo mek tih a sawi.
“Hmanni lawkah PWD minister chuan a office atangin ZPM candidate-te vote tura sawmna a tichhuak a, mualpho takin ngaihdam a dil a ngai a. Sport minister pawhin sawi a kai a, tunah CM insawifiah tura tih a ni leh a. Mipui sawrkar niloin, BJP kal dan entawn ZPM sawrkar kan hrawn mek a ni,” a ti.
Hriat theih chinah VC leh LC term pawh tawi chu Mizoramah a vawikhatna a ni, tiin, term pawh tawi chhan an sawi hi sawrkara minister-te leh CM adviser-te sawi a inanglo vek a, mipui pawhin rin tur ber an hre lo MPCC Media chairman hian a sawi.
“VC leh LC term hi, Covid len lai khan pawh sei a ni a, kha kha chu chhan tha tak nei a ni. Sawrkar kal tawhte ah hetianga mipui thlante term pawh tawi hi kan hre ngai loa, puitling takin an thawhpui zawk thin a, inthliarna a awm kan hre ngai lo,” a ti.
ZPM chuan an thusawi an zuk a, an sawi loh angin an awm a, a bul ber chu ideology an neih loh vang a ni a. Ideology mumal nei lo chu a kal thui theih loh tiin a sawi bawk.
ZPM chu hleih bik nei lo tura intiam, mipui sawrkar din tum an ni a. Tun VC leh LC inthlanah ZPM an chak emaw chak lo emaw mipui thlante chu an thawhpui thei tur a ni a, chu chu democracy kalphung pawh a ni tih Remruata Renthlei hian a sawi. “VC leh LC thawhpui thei lo tura sawi hi a fuh loa, khawtlangin anmahni enkawl tura tha bera an thlan chu sawrkarin a thawhpui mai tur a ni,” a ti.
Tuna chief minister ni lai Pu Lalduhoma ngeiin, ruling VC-te chu a tlangpuiin an corrupt thin avangin mipuiin an chanai an chang lo fo a. Ruling party-ten MLA inthlanah pawh an VC-te avangin an chhiat phah fo thin a. Hetiang thil hi kan zavaia kan tawnhriat hnu a nih avangin, mipuiin kan khawtlang tan ruling VC nge kan thatpui anga, oppostion VC tih uluk taka ngaihtuah turin mipui a lo ngen tawh tih MPCC hruaitu hian sawiin, “Mipui pawhin rilru fim takin tun tum inthlanah hian vote thlak turin kan sawm a ni,” a ti.