Mipui thinrimin Hasina-i chhungkaw in suasam

Bangladesh-a mipui thin inhawr khawm chuan an prime minister paih thlak tak, Sheikh Hasina-i te chhungkaw chenna thin bakah a party mi leh sa eng emaw zat in an suasam.
Hasina-i hi nikuma zirlai kaihhruaia nawrhna huaihawta paih thlak a nih hnuah India-ah a tlanchhe mek a, social media kaltlangin thu a sawi dawn tih thawm a awm hnu lawkah an in hi suasamsak a ni.
Kum 77 mi, kum 20 lai an ram lo hruai tawhtu, Hasina-i hi mipuiin an paih thlak dawn khan a sorkar kalpui dan chu thuneitu pakhat chauh awm ang maiin a hruai niin an puh a ni.
Nilaini zan khan excavator hmangin Hasina-i pa, Bangladesh pian tira an president lo ni tawh, Sheikh Mujibur Rahman-a lo chenna thin nawr chhiat a ni a. He in hi museum atana hman tawh a ni.
Hasina-i pa hi independence hero anga ngaih a ni a; mahse, a fanu hi a hmingthatna zawng zawng a tichhe vek niin an ngai.
Facebook livestream-ah Hasina-i hian beihna chu a dem thu leh a titute lakah ‘dikna’ hlen chhuah a phut thu a sawi.
“In chu an nawr chhia a ni thei, history erawh an tireh thei lo,” a ti.
Hasina-i hi mipui rorelna tung dingtu zinga ngaih a lo ni ve tawh thin a, hemi hnua ram rorelna fawng a chelh atangin an ngaihdan a hniam hret hret a. Inthlan tichingpen leh amah sawiseltute lung ina daha puh a ni a, a sorkar chu ei ru nasaa puh a ni bawk.
Nikuma zirlai kaihhruaia lungawi lohna lantira mi 100 chuang thihna a hmachhawn danah tharum a hman avangin manna thupek chhuah hial a ni.
August thlaa India-a a tlanchhiat hnuah pawh amah leh a kaihhruai, Awami League party-a a awmpuite laka thinrimna a la reh hlei thei lo.
Nilainiah pawh khan mipuite hian an hruaitu hlunte in leh sumdawnna hmunte suasamin an hal nual a. ‘Mahni inchawikan tumte awmna hmun’-a an ram siamtuah an puh.
Police chuan mi 700 vel Nilaini zan khan Hasina-i pa inah an pungkhawm a, police officer tam tak dah an ni bawk tih an sawi.
Hasina-i paih thlak a nih hnuah sorkar lailawk ding mek chu Nobel laureate Muhammad Yunusa-’n a kaihruai mek.
Anni hian buaina hi an la hmet mit tak tak thei lo va, tun hnai maiah pawh khawlaia pungkhawma Hasina-i mana hremna pek phut an la awm reng.
Yunus-a sorkar pawhin Hasina-i hi India atanga hruai haw a tum a reng a. An ram eibar dinhmun chhe mek, Hasina-i’n a lema a thantir tia a sawi tihthat tumin a bei a, khatih lai khan dollar tluklehdingawn tel chhehrelh niin a sawi bawk.
Yunus-a hian kumin kum tawp lamah emaw, nakum kum tir lamah emaw inthlan huaihawt a tiam.