Mipui vanga awm…

Sawrkar hi mipui siam a ni a, mipui vanga awm a ni. Sumdawngte pawh hi dawrtu mipui vanga sumdawng thei an ni. Eng pawh mai hi a awm chhan chu mipui a ni vek mai. Mipui hi an lal ber a, an pawimawh ber bawk.
Mipui lalna hnuaia sawrkar thuneihna kan tih hi, chief minister te, minister te, MLA te, Secretary leh sawrkar official-te ta a ni ngawt lo a, mipuiin mipui aiawha thuneihna nei tura an dah avanga thu nei thei mai chauh an ni.
Tunhmaa chief minister ni thinte kha, chief minister an nih laia dinhmun sang tak an neih te, hamthatna hrang hrang an neih te, thuneihna an neih zawng zawngte kha, engatinge an hman (exercise) zui zel theih tak loh? A chhan chu mipuiin thuneihna an pek tawh loh vang a ni.
Sawrkar hnathawk officer liante pawh, an pension hma chuan thu an nei em em a, an pension hnuah chuan hna an thawh laia thuneihna an neih ang kha an hmang chhunzawm zel thei tawh lo. An thawh thinna department office-ah lengin, tunhmaa thu an pek ang khan thawktute thu pek han tum leh teh se, tumahin an thu an zawm tawh dawn lo; mipui Dan-in a phal tawh lo miau a.
Sumdawngte pawh hi, mipui vanga sumdawng thei an ni a, mipui tlemnaa leh mipui tamnaa sumdawnna dinhmun inthlauhzia pawh kan hmuin kan hre vek. Chutiang bawkin bungraw phur leh passenger phur lirtheite pawh hi mipui vanga awm an ni.
Engkim mai hi mipui vanga awm a ni, tiin a khawikhawm theih mai awm e.
Sawrkar hnathawk an nuar a, political party leh pawl hrang hrangte pawhin lungawilohna lantirnan bandh te an huaihawt a, sumdawngte pawhin lungawilohna lantir nan dawr te an khar a. Bungrua leh passenger phur lirtheite pawhin an thil phut tihhlawhtlin ngiatin lirthei tlan lova tiam chin awm lova din tumin hma an la leh mek bawk a.
Mipui vanga awmte hian mipui hi an ching phar nasa thei hle, mipui hi hmanruaah an hmang a, mipui hi an dim lova, mipui hi an zah lo ti pawhin a sawi theih hial awm e. A chhan chu, mipui tawrhtir te te phawt an duh zel dan atang hian a lang mai a ni.
Mipui aiawha rorel turte an awm a, mipui vanga eizawnna nei thei sumdawng hrang hrangte an awm bawk a, mipui tawrhtir kher lo hian harsatna chinfel dan hi zawng thin tawh rawh se. Mipui harsatna siam zawng khera thil a thleng thin hi, mipui (consumer) lam hian nawrh an huahawt khum ve hlauh chuan, an hawi hil hle mai ang.