Mipui zar zo theih sawrkar tha siam turin ZPM duhsak

Mipui zar zo theih sawrkar
tha siam turin ZPM duhsak
Mizoram mipui zar zo theih tur sawrkar tha siam turin ZPM party a duhsak tih Congress president Lalsawta chuan a sawi.
Thawhtannia MLA inthlan result puan hnua Congress party-in Congress Bhawan-a inkhawm a buatsaihah MPCC president chuan Pathianin engkim tan hun a ruat a, theihtawpin an party mite an tang a, an vaiin an thawk a, an hun a la her rih lo tih a sawi.
Anmahni duhsaktu Mizoram mipui chungah lawmthu a sawi tih sawiin, “Congress party mi, kan candidate-te thawhrimna leh inpeknaah lawmthu ka sawi a. Kan duh ang result nei thei lo mah ila, ram leh hnam tana thawhna kawngah ralbang thei kan ni lo. Zam loin, theihtawpin a hma aia nasa zawkin kan thawh a ngai,” a ti. An tih tur kawng tinrengah inluangrualna nen ram tana thawk zel turin party mite a sawm tih a sawi a. Ram tana thil tha tih kawngah theihtawpin an party chuan a thawhpui dawn tih a sawi bawk.
Congress ticket-a Lawngtlai West biala thlan Pu C Ngunlianchunga an lawmpuiin an chhuang takzet tih Lalsawta hian sawiin, “Mizoram mipuiin duhtaka an thlan MNF leh ZPM MLA te ka lawmpui a, ZPM chu Mizoram tana sawrkar tha tak siam turin duhsakna ka hlan. Mizoram mipui zawng zawngin a zar an zo theih tur sawrkar tha an siam ngei theihnan duhsakna kan hlan a ni,” a ti.
Congress Legislature Party leader Zodintluanga Ralte pawhin Mizoram hmun hrang hrang atangin tawrhpuina an dawng a, zam lo tur leh ram tana theihtawp chhuah zual sauh turin an ngen tih sawiin, “Chutiang tur chuan rilru thar nen kan ram leh hnam tan party mi zawng zawng nasa zawka thawk zel turin ka sawm a ni,” a ti.
He hunah hian AICC aiawhin Sachin Rao leh Mathew Antony ten thu an sawi bawk.