Mipuia sum luh tamna atan NLUP tha zawk kalpui tum

Mipuia sum luh tamna atan
NLUP tha zawk kalpui tum
Mipui kuta sum a luh tam leh theihna atan Congress a sawrkar chuan NLUP tha leh changtlung zawk an kalpui dawn tih Congress hruaitu Lalnunmawia Chuaungo chuan a sawi.
Ningani khan Champhai South Block Congress Committee buatsaihin VC inthlana INC candidate-a tlingte hnenah chawimawina certificate hlanin, tling zo ta lo hnenah ngaihhlutna certificate hlan an ni a. Hmanpuitu MPCC senior vice president Lalnunmawia Chuaungo chuan, Mizoramah chhungkaw sing 5 bak atangin sawrkar hnathawk an awm loa, tun state budget-ah khan sawrkar hnathawk tan kan budget-ah zaa 60 chuang a kal a. Mipui chan a tlem em em tih a sawi.
“Mipui nawlpuiin sum lakluhna tha kan neih loh chuan kan ram economy a chhe thin. Sawrkar hnathawkte hlawh leh mipui chan a inbuk tawk loh chuan ram tan a pawi hle dawn a, mipuia sum a luh tam theihnan NLUP tha zawk leh changtlung zawk kan thar thawh leh ngei ngei a ngai,” a ti.
Chhungkaw tinin kan tu leh fate chu mipuitlinga chher chhuah kan duh ber a. Zirtirna tha dawng a, mipuitlinga chher chhuak turin tuna kan education chuan min thlen zo lo tih chief secretary hlui Lalnunmawia Chuaungo hian a sawi. “Sawrkarin sum tam tak a seng a. Mah se, private school kan ring zawk. Administrative reforms leh curriculum reforms hi kan sawrkar hunah kan tidanglam dawn,” a ti.
ZPM sawrkarin universal health care scheme, cheng nuai 5 thlenga bill theihna siam mah se, mipuiin an thlen chin kan hria tih MPCC hruaitu hian sawiin, “Health care tha zawk hi Mizoram mipuiin kan mamawh a. Chhungkaw 250000 vel hian tuna kan health care hi an hmang tangkai hleithei loa, tangkai zawka an hman theihnan health care changtlung zawk kan kalpui dawn a ni,” a ti bawk.