Mipuiin kan right hriat pawimawh

Google News Initiative India leh DataLEADS chuan Zirtawpni khan Aizawla thuthar thehdarhtute tan inthlanpui kaihhnawiha hriat tur inhrilhhriatna an buatsaih a, mithiam sawmbik ten an zirtir a. Technology changkang chho zelah journalist-te pawhin bum an tawk ve thei a ni tih hre tur leh chutiang laka fimkhur tur chuan an chah a. Mizorama youtuber-te chungchang sawi telin, youtuber thenkhatin journalism kalphung hre mumal lovin anmahni duh dan danin politics chungchang video an siam thin tih sawi a ni a. Politics kaihhnawihah mipui ngaihdan an la kual ve ringawt zel te chu thil tha a nih loh thu sawiin, Mizo youtuber thenkhat chu fimkhur turin an ngen a ni.
Youtuber thenkhatin journalism kalphung hre mumal lova anmahni duh dan dana video an lo siam thin a nih pawhin, dan lam chuan a kawng a zawh mai turah a ngaih theih ang a. Hetih rual hian, mipui lam zawk hian youtuber-te hmachhawn kawngah, kan right kan hriat chian a pawimawh dawn hle tih a lo lang nghal bawk awm e.
Youtuber pakhat Mr A. chuan election kaihhnawihah khawlai fangin a mi hmuh remchan apiang a interview a, eng party nge chaka a rin? tih zawhnate a zawt a. |henkhat chuan langtlang tlakin an ngaihdan an sawi mai a, thenkhat erawh chuan thukhuh deuh takin an chhang a, thenkhat chuan an hriat loh thuin an chhang bawk a. Hetiang video hi youtube-ah a tam em em a, chu chu mi thenkhatin an comment a, ‘mahni ngaihdan pawh sawi thei lo’ ti tein an dem zui a.
Hetiang nikhuaah hian youtuber-te zawhna chhan kher hi mipui hian an ba lo va, ngaihdan an sawi emaw an sawi lo emaw kha an right a ni a, chu chu dem zui kherna tur a awm lo a ni.