Mipuite hi sorkar neitu…

Mipuite hi sorkar neitu kan nih angin sorkar hi kan ta neih vek a tul, tiin deputy chief minister chuan tunhnaia Aizawl Smart City Ltd programme huaihawt a hmanpuinaah a sawi a.
Mipuiin mipui tana mipui sawrkar an siamna democracy rama awm kan ni a, mipuite hian sawrkar neitu kan nih dan hi kan hriatchian a pawimawh hle reng a; chutih rualin, sawrkarna chelhtu ram hruaitute pawh hi, sawrkar awmzia hrechiangtu an nih a pawimawh hlei hlei awm e.
India ram state thenkhatah a tha zawnga ram dinhmun inlumlet hmuh tur a awm thin a. State pakhat chu rorelna fel lo avanga eiruk hluarna, rethei leh hausa inthlauhna, hmasawnna khairual lo, law and order mumal loh avanga insuam, inrawk leh intihbuaina hluarna a ni thin a. Roreltuten sawrkar neitu chu mipui an ni tih hre mah se, mipui lamin sawrkar neitu an nihna an inhriatchian miau loh avangin dik lo taka thiltihna a hluar a. Chumi hnuah ram hruaitu thar, sawrkar neitu chu mipuite an ni tih hretuten ro an han rel ve thung a, ramin hma a sawn zawt zawt a, hausa leh rethei kar a lo zim a, mipui an hlim a, state-in hmel thar a hmu a. Mipui lamin sawrkar neitu an ni tih inhre chiang lo mah se, roreltu lamin sawrkar neitu chu mipuite an ni tih an hriatchian miau avangin thiltihin mipui an entir a, an hrilhfiah a. Ram hruaituten sawrkar awmzia an hrechian avanga inlumlet a ni.
Hetiang deuh hian, ram inrelbawlna hna thawktu leh rorelna kengkawhtu, ram hruaitu kan tihte hian, sawrkar awmzia an hriatchian hmasak a, chu chu thiltiha mipui hnena an chhawp chhuah a, an entir a ngai thin. Mizoramah hian thingtlang khaw lam hian khawpui lamin an dawn ang leh an hmuh ang, an neih ang hmasawnna hi engatinge an neih loh bik tlat zel? Heng, education, health, transportation etc. ah te hian engatinge thingtlang lam hi an hnufual bik? Sawrkar neitu theuh theuh hi engatinge kan dinhmun a inthlauh viau? Heng zawhnate hi sawrkar neitu mipuite’n sawrkarna fawng chelhtu apiangte hnena an zawhna a la ni fan awm e.