MIS officer-te intuaithar zo

Directorate of Information & Public Relations department buatsaih Mizoram Information Service (MIS) officer-te tana ni hnih awh in-house training chu Zirtawpni khan nei zoin khar a ni.
A kharna inkhawm hmanpuitu I&PR secretary Betsy Zothanpari Sailo chuan tunhma atanga I&PR department hmalakna leh hmingthatna chhawmnung zel tura tanrual a pawimawh tih sawiin, hemi atana pawimawh in-house training buatsaih a ni chu lawmawm a tih thu a sawi a. MIS officer-te chu an mawhphurhna tha taka hlenchhuah tum tur leh sawrkar hnathawk, mipui rawngbawl an nih anga thahnemngai taka thawk turin a fuih.
Department hnuaiah reorganization kalpui chhoh mek a ni, tiin, hnathawhna tur hmanraw mamawh angte ngaihtuah zel a ni tih a sawi bawk.
I&PR director C Lalnunkima chuan training hun reilote chhunga topic pawimawh tak tak zirho a ni chu lawmawm a tih thu sawiin, zirtirna pe tura sawm resource person-te, course co-ordinator leh trainee-te inpekna fakawm a tih thu a sawi.