Miss Japan tiltle an hlihsak

Karolina Shiino, kum 26, chu kar hnih awrh Miss Japan a ni hman tihah a crown a pek kir a ngai leh ta. Karolina Shiino hi nupui pawmlai nei mipakhat nen an inkawp niawma chanchinbu lama tarlan a nih avangin a title an hlihsak leh ta a ni.
Karolina Shiino chuan Instagram-ah thupha chawina tichhuakin, “Hetiang buaina nasa tak ka thlen avang leh min support-tu te leh midang zawng zawng phatsan zawnga ka awm avangin pawi ka ti takzet a ni,” a ti.
Karolina chuan mipa a kawp nia an tarlan, doctor leh influencer Takuma Maeda chu pawmlai nei a ni tih a hre lo niin a sawi a, Maeda pawhin social media lamah thupha chawina tichhuakin, Shiino leh midang he thil avanga a tihbuai zawng zawng chungah thupha a chawi ve bawk a ni.
Karolina Shiino title an hlih sak leh takah chuan a aiawha Miss Japan dang ruat an tum chuang lo niin Miss Nippon Association hotu Kaoru Wada chuan a sawi ve bawk.
Karolina Shiino hi January ni 22 khan Miss Japan-ah thlan a ni a, a tirah pawh inhnialna a chawk chhuak deuh laih tawh a, amah hi Ukraine a piang a nih avangin Miss Japan ni turin a tling tawk lo ti pawl an awm a ni. Shiino hi kum 5 mi a nih atangin Japan-ah a khawsa tawh a, Japan-a piang ni lo mah se Japan khua-leh-tui dik tak a ni tawh a ni.