Miss Mizoram 2024 atan District Miss Mizoram thlang

2024 Miss Mizoram a district hrang hrang aiawh turte MJA kaihhruainain thlan an ni a, heng District Miss Mizoram te hi 2024 Miss Mizoram finalist an ni nghal a, anni bakah hian Aizawl-a open audition-a inlan atangin final round a tel tur thlan leh an ni dawn bawk a ni. District MJA kaihhruainain district thenkhatin aiawh tur hi an thlang fel tawh nghe nghe a ni.
Miss Mizoram 2024 thlanna kal mekah nimin, March 27, 2024 (Nilaini) chhun khan MJA, Lawngtlai District leh Hnahthial District-te chuan an district aiawha tel turte Aizawlah an puang a; district miss crown khumtir an ni.
Lawngtlai District Miss puanna leh crown khumtirna hi Aizawla Lai House, Bungkawnah neih a ni a, Lawngtlai District MJA Vice President, Lalchharliana’n kaihruaiin, President Elvis Lalthangzuala’n Lawngtlai District Miss chu L Lalnuntluangi d/o L Thangzela (L), Sangau a nih thu a puang. Lai House Aizawl Deputy Resident Commissioner T Lalhminghlupui’n miss crown a khumtir a ni.
L Lalnuntluangi hi Hrangbana College-a 6th semester zirlai a ni a, Tuikual South-ah a cheng mek. Miss Mizoram contest-a a inbuatsaihna atan MJA, Lawngtlai District chuan Rs 10,000 an hlan nghal.
Hnahthial District Miss puanna chu Aizawl Press Club-ah neih a ni a, MJA, Hnahthial District President, F Zosangliana’n a kaihhruai a, Secretary, VL Liansanga’n Hnahthial District aiawha Miss Mizoram 2024-a tel tur chu H Zohmingthangi d/o H Rodingliana, Bualpui-H a nih thu a puang.
H Zohmingthangi hi miss crown khumtir niin, lawmpuina thuchei hlan nghal a ni. MJA, Hnahthial District chuan a inbuatsaihna senso atan Rs 5,000 an hlan bawk.
Miss Mizoram 2024 thlanna kal mekah hian Aizawlah chuan March 25, 2024 khan Open Audition neih a ni a, zanin hian result puan a ni dawn. Aizawla Open Audition-a tlingte leh district tin aiawhte chu an inel chho dawn a, final round chu April 4, 2024-ah tan tum a ni.