Miss Northeast Diva 2025 R. Lalduhsaki

Nizan hmasa a Radisson Blu, Guwahati-a Miss Northeast Diva 2025 Grand Finale-ah Mizo nula R. Lalduhsaki chu winner niin, Mizo nula zinga ‘Miss Northeast Diva’ title dawng thei hmasa ber a ni a, he intihsiaknaah hian ‘Miss Congeniality’-ah thlan a ni bawk.
India hmarchhak tana beauty pageant ngaihhlut hlawh tak Miss Northeast Diva-ah hian kumin atan mi 100 chuangin audition neiin, chuta tang chuan intihsiakna tak tak a tel turin mi 40 thlan chhuah an ni a. Chuta tang chuan top 20, top 10 leh top 5 te thlan niin, top 5 atangin winner an thlang ta a ni.
Miss Northeast Diva hi 2015 atang khan thlan tan a ni a, winner te chu Liva Miss Diva-a an tel thei thin a, kumin pawh hian Duhsaki hi Liva Miss Diva 2025-ah Northeast India ai awh turin a tling nghal bawk a ni.
Beauty pageantry-ah Mizo nulate thlen chin a sang telh telh a, hmanni lawkah Miss Grand India 2025-ah Mizo nula Vanlalnuntluangi chu First Runner Up a rawn ni tawh bawk a, kumin chu beauty pageantry a Mizo nulate an chet that ber kum a ni hial awm e.